انگریزی زبان میں ایسا لگتا ہے کہ ہر لفظ کا کوئی نہ کوئی مخفف ہوتا ہے جو بہت عام ہوتا ہے، مگر ان کے اصل مطلب اکثر افراد کو معلوم نہیں ہوتے۔

انگریزی زبان میں ایسا لگتا ہے کہ ہر لفظ کا کوئی نہ کوئی مخفف ہوتا ہے جو بہت عام ہوتا ہے، مگر ان کے اصل مطلب اکثر افراد کو معلوم نہیں ہوتے۔ جیسے معروف مخفف سم کارڈ اور یو ایس بی۔اس میں عام ٹیکنالوجی مخفف جو تقریباً ہر ویب سائٹ کا حصہ ہوتا ہے یعنی ’’ڈاٹ کام‘‘ بھی شامل ہے۔یقیناً بہت سے لوگ موبائل، لیپ ٹاپ یا کمپیوٹر پر جاتے ہیں، مگرکیا آپ نے کبھی سوچا کہ کسی ویب سائٹ کے آخر میں ’’ڈاٹ کام‘‘ (.com) کا مطلب کیا ہے؟
ڈاٹ کام کس لفظ کا مخفف ہے؟
 ویسے کچھ ویب سائٹ ڈومین تو سمجھنا آسان ہوتے ہیں جیسے ڈاٹ ای ڈی یو (.edu) یا ڈاٹ جی او وی (.gov) وغیرہ، مگر جب پوچھا جائے کہ ڈاٹ کام کا مطلب کیا ہے تو اکثر افراد ہوسکتا ہے کہ اس کا مطلب کمپیوٹر یا کمیونی کیشن بتائیں مگر یہ دونوں ہی اس مخفف کے اصل معنی نہیں ہیں۔درحقیقت ڈاٹ کام لفظ ’’کمرشیل ‘‘(commercial)کا مخفف ہے، مگر یہ بھی حقیقت ہے کہ ہر ویب سائٹ کمرشیل مقاصد کیلئے استعمال نہیں ہوتی مگر چونکہ’’ ڈاٹ کام‘‘ ڈومین نام ہر ایک کو دستیاب تھا اور یہ ای ڈی یو یا جی او وی سے مختلف تھا، تو یہ ہر جگہ چھا گیا۔
کیا اس کا کچھ اور مطلب بھی ہے؟
 ویسے تو ڈاٹ کام کمرشیل کا مخفف ہے مگر کچھ ٹیکنالوجی ماہرین کے خیال میں یہ کسی اور لفظ کو چھوٹا کیا گیا ہے اور وہ ہے کمپنی (company)۔ انٹرنیٹ کی ابتدا یعنی ۸۰ءاور۹۰ء کی دہائی میں ایم آئی ٹی کے ڈیولپر جیک ہیورٹی کے مطابق اس زمانے میں انٹرنیٹ کاروباری اداروں سے کنیکٹ نہیں تھا اور اس زمانے میں ڈاٹ کام سے کاروبار کا خیال ذہن میں نہیں آتا تھا جہاں لوگ کچھ خرید سکیں۔ درحقیقت اس وقت مختلف کمپنیاں حکومتی معاہدوں پر انٹرنیٹ پر کام کرتی تھیں تو ڈاٹ کام کیلئے کمپنی زیادہ منطقی مخفف ہےمگر اب چونکہ انٹرنیٹ بہت پھیل چکا ہے اور فی زمانہ یہ تجارت کیلئے بنیادی پلیٹ فارم کی حیثیت رکھتا ہے تو کمرشیل غیر متنازع طور پر ڈاٹ کام کے معنی کی جگہ لے چکا ہے اور لوگ بھی اسے قبول کرچکے ہیں۔