نئے سال کے موقع پر نئی شروعات کا خیال خاصا عام ہے کیونکہ زیادہ تر لوگوں کیلئے اس سے انہیں ایک خاص مقصد حاصل کرنے کیلئے خود کو متحرک کرنے میں مدد ملتی ہے۔

نئے سال کے موقع پر نئی شروعات کا خیال خاصا عام ہے کیونکہ زیادہ تر لوگوں کیلئے اس سے انہیں ایک خاص مقصد حاصل کرنے کیلئے خود کو متحرک کرنے میں مدد ملتی ہے۔ اس دوران بہت سے افراد خود سے مختلف عہد کرتے ہیںلیکن کیا آپ نے کبھی غور کیا کہ بیشتر افراد اپنی جسمانی صحت یا فٹنس کو بہتر بنانے کیلئے یکم جنوری یا ہفتہ کے پہلے دن یعنی پیر ہی کا انتظار کیوں کرتے ہیں؟
اس کی مختلف وجوہات ہیں
 نفسیات کے پروفیسر ڈاکٹر جان نورکراس نے ۴۰؍سال سے زائد عرصے تک نئے سال کی قراردادوں پر تحقیق کی اور ان کے نتائج سے پتہ چلتا ہے کہ لوگ نئے سال کے موقع پر سب سے زیادہ اپنی صحت کے بارے میں عہد کرتے ہیں۔جن ہزاروں لوگوں کا انہوں نے مطالعہ کیا، ان میں سے ایک تہائی سے زیادہ نے کہا کہ ان کا بنیادی مقصد اپنی صحت کو بہتر بنانا ہوتا ہے۔ اس کے علاوہ دوسرے نمبر پر ایسے لوگ آتے ہیں جو اپنا وزن کم کرنا چاہتے ہیں، ڈاکٹر جان کی تحقیق میں شامل ۲۰؍ فیصد افراد نے وزن کم کرنے کی خواہش کا اظہار کیا جبکہ ۱۳؍فیصد نے کہا کہ وہ اپنی کھانے کی عادات تبدیل کرنا چاہتے ہیں۔اس احساس کی ایک بڑی وجہ کرسمس کے دوران کھانے میں ہونے والی بے ضابطگی بھی ہے جس سے صحتیاب ہونے کی کوشش کرنے کیلئے لوگ تبدیلی کی ضرورت محسوس کرتے ہیں۔
بیشتر افراد اپنے اس عہد کو پورا نہیں کر پاتے
  تحقیق سے پتہ چلتا ہے کہ نئے برس کے آغاز پر اپنی جسمانی صحت یا فٹنس کے بارے میں جو عہد کرتے ہیں وہ اکثر پورے نہیں کرپاتے۔ ڈاکٹر جان نے یہ جاننے کی کوشش کی کہ ان عہدوں کو کس حد تک مکمل کیا گیا، تو انہیں پتہ چلا کہ ایک تہائی افراد نے صرف ایک ماہ بعد ہی اپنے عہد کی تکمیل کیلئے درکار کام کرنا چھوڑ دیئے جبکہ چھ ماہ بعد اکثریت اپنے نئے سال کے عہد کو چھوڑ یا بھول چکی تھی۔
بیشتر افرادجم جانے کیلئے پیر کا انتظار کرتے ہیں، کیوں؟
اتوار اور پیر کو ہفتے کا آغاز قرار دیا جاتا ہے۔ حالانکہ پیر کے ہفتے کا آغاز ہونے کا خیال صرف ایک سماجی تعمیر ہے۔تحقیق کے مطابق لوگوں کو اگر کوئی نیا کام کرنا ہو تو وہ پیر کا انتخاب کرتے ہیں کیونکہ وہ اسے غیر ارادی طور پر ’’تازہ شروعات‘‘ قرار دیتے ہیں۔جم جانے والے افراد بھی اسی وجہ سے اپنی صحت بہتر بنانے کیلئے اس دن کو مناسب سمجھتے ہیں۔