انہوںنےاپنی تحقیق کا زیادہ تر حصہ مکئی کی جینیات پر مرکوز کیا۔انہیں نوبیل انعام سمیت کئی اعلیٰ ایوارڈز اور اعزازی ڈاکٹریٹ کی ڈگری بھی عطا کی گئی تھی۔

باربرا میک کلینٹک (Barbara McClintock) ایک معروف امریکی جینیاتی ماہر تھیں جنہیں۱۹۸۳ءمیں فزیالوجی یا میڈیسن میں نوبیل انعام سے نوازا گیا تھا۔ ان کا سب سے مشہور کام ’’جینیاتی نقل مکانی‘‘ (genetic transposition) کے متعلق تھا جس میں انہوں نے دریافت کیا کہ جینیاتی مواد مخصوص حالات میں اپنی جگہ تبدیل کر سکتا ہے، یہ عمل جینیاتی تغیرات اور ارتقاءکیلئے اہم ہے۔
 باربرا میک کلینٹک۱۶؍ جون۱۹۰۲ء کوہارٹ فورڈ ، کنیکٹیکٹ میں پیدا ہوئی تھیں۔میک کلینٹک اپنی خالہ اور چچا کے ساتھ بروکلین، نیویارک میں رہتی تھیں تاکہ ان کے والدین پر مالی بوجھ نہ پڑے۔وہ ایک باصلاحیت اور محنتی طالبہ تھیں۔ باربرا نے اپنی ابتدائی اورثانوی تعلیم بروکلین کے ایراسمس ہال ہائی اسکول سے مکمل کی ۔انہوں نے ۱۹۱۹ءکے اوائل میں گریجویشن کیا۔ یہیں سے انہیں سائنس میں دلچسپی پیدا ہوئی۔ وہ کورنیل یونیورسٹی میں اپنی تعلیم جاری رکھنا چاہتی تھیں مگر ان کی والدہ اس کے خلاف تھیں جبکہ والد نے ساتھ دیا اوراس طرح وہ اپنی تعلیم آگے جاری رکھ سکیں۔ ان کے ذہنی استعداد اور جینیات کے شعبے میں دلچسپی نے انہیں اس میدان میں بہترین بنایا۔ انہوں نے جینیات کے شعبے میں تحقیق کا آغاز کیا اور پھر اسے اپنے کریئر کا مرکزی نقطہ بنایا۔باربرانے ایم اے اور ۱۹۲۷ءمیں پی ایچ ڈی کی ڈگری حاصل کی ۔
 باربرا نے ۱۹۳۰ءاور ۱۹۴۰ء کی دہائیوں میں جینیات کی دنیا میں اہم تحقیق کی۔ ان کے تحقیقی کام نے جینیات کے بنیادی اصولوں کو مکمل طور پر تبدیل کر دیا۔انہوںنے اپنے تحقیقاتی کام میں یہ دریافت کیا کہ جینیاتی مواد (جینی) نہ صرف اپنے کروموزوم پر مستحکم رہتا ہے، بلکہ وہ خاص حالات میں اپنی جگہ تبدیل بھی کر سکتا ہے۔ اس عمل کو ’’جینیاتی نقل مکانی‘‘ یا’’ٹرانسپوزیشن‘‘ کہا جاتا ہے۔ ان کا یہ کام۱۹۴۰ء کی دہائی میں شروع ہوا تھا جب انہوں نے مکھیوں اور مکئی کی جینیاتی مواد کا مطالعہ کیا تھا۔باربرامیک کلینٹک نے اپنی تحقیق کا زیادہ تر حصہ مکئی کی جینیات پر مرکوز کیا۔ ان کی تحقیقات نے یہ ظاہر کیا کہ جینیٹک مواد کی منتقلی اور مختلف حصوں میں جانا جینیاتی تنوع کی بنیاد ہے۔ 
  باربرا میک کلینٹک کو۱۹۸۳ءمیں ’’جینیاتی نقل مکانی‘‘ کے انقلابی کام پر نوبیل انعام سے نوازا گیا تھا۔ انہیں یہ ایوارڈ اس دریافت کیلئے دیا گیا کہ جینیٹک مواد مختلف جگہوں پر منتقل ہو سکتا ہے جو اس وقت ایک نیا اور حیرت انگیز تصور تھا۔ ان کا کام جینیات کی دنیا میں ایک سنگ میل ثابت ہوا اور انہوں نے اس شعبے میں تحقیق کے کئی راستے کھولے۔ان کی کامیابیاں اور سائنس کے میدان میں ان کی اہمیت آج بھی محققین اور سائنسدانوں کیلئے ایک ماڈل کی حیثیت رکھتی ہیں۔ باربرا میک کلینٹک کا نام نہ صرف جینیات بلکہ سائنس کی تاریخ میں ایک ابدی مقام رکھتا ہے۔
 ۱۹۴۷ءمیںباربرا کو امریکن اسوسی ایشن آف یونیورسٹی وومن سے اچیومنٹ ایوارڈ ملا۔ وہ ۱۹۵۹ءمیں امریکن اکیڈمی آف آرٹس اینڈ سائنسز کی فیلو منتخب ہوئیں۔ ۱۹۶۷ء میں انہوں نے جینیات میں کیمپر پرائز حاصل کیا اور تین سال بعد، انہیں نیشنل میڈل آف سائنس سے نوازا گیا۔ یہ اعزاز پانے والی وہ پہلی خاتون تھیں۔ اس کے علاوہ بھی انہیں کئی اعزازات تفویض کئے گئے۔متعدد تعلیمی اداروں نے انہیں اعزازی ڈاکٹریٹ کی ڈگری بھی عطا کی۔باربرا میک کلینٹک کا انتقال ۲؍ستمبر ۱۹۹۲ء کو نیو یارک میں ہوا تھا۔