سوجوئے گھوش کی ہدایتکاری میں بننے والی فلم میں شاہ رخ خان پہلی مرتبہ اپنی بیٹی سہانا کے ساتھ نظر آئیں گے۔

منگل کو امیتابھ بچن نے تصدیق کی کہ ابھیشیک بچن جلد ہی فلمساز سوجوئے گھوش کی آنے والی فلم ’کنگ‘ میں وِلن کے کردار میں شاہ رخ خان کے ساتھ نظر آئیں گے۔ شاہ رخ خان پہلی مرتبہ اپنی بیٹی سہانا کے ساتھ اس فلم میں کام کریں گے۔ امیتابھ نے ایکس پر اپنے بیٹے کو آنے والی فلم کیلئے نیک خواہشات دیتے ہوئے لکھا کہ ’’آل دی بیسٹ ابھیشیک۔ یہ وقت ہے۔‘‘

all the best Abhishek .. It is TIME !!! https://t.co/LI6F7gZ1b0

— Amitabh Bachchan (@SrBachchan) July 16, 2024

 امیتابھ بچن کے ذریعے شیئر کی گئی رپورٹ کے مطابق ابھیشیک اس فلم میں وِلن کے کردار میں دکھائی دیں گے۔ اس فلم کے ایکشن مناظر ’پٹھان‘ کے ہدایتکار سدھارتھ آنند نے کوریوگراف کئے ہیں۔ فی الحال سہانا خان اور شاہ رخ خان کے کردار کے بارے میں کچھ بھی بتایا نہیں گیا ہے۔ 
سدھارتھ کی مارفلکس پکچر اور شاہ رخ خان کی ریڈ چیلیز انٹر ٹینمینٹ کے ذریعے پروڈیوس کی گئی ’’کنگ‘‘ کی شوٹنگ چند مہینوں میں مکمل ہوجائے گی جبکہ فلم کو ۲۰۲۵ء کے آخر میں یا ۲۰۲۶ء کے شروع میں سنیما گھروں میں ریلیز کیا جائے گا۔
’کہانی ‘ اور ’بدلہ‘ جیسی اپنی فلموں کے لئے مشہور سوجوئے نے آخری بارنیٹ فلکس پر ریلیز ہوئی تھریلر فلم ’’جانے جاں‘‘ کی ہدایت کاری کی تھی۔ اس سے قبل انہوں نے ابھیشیک کے ساتھ ۲۰۲۱ء کی ’’باب بسواس ‘‘ میں ساتھ کام کیا تھا جو ۲۰۱۲ء کی سنسنی خیز فلم ’کہانی‘ کا اسپن آف تھی۔
ابھیشیک اس سے پہلے شاہ رخ کے ساتھ کئی فلموں میں نظر آچکے ہیں جن میں کرن جوہر کی ۲۰۰۶ ء کی فلم ’’کبھی الودع نہ کہنا‘‘ اور فرح خان کی ۲۰۱۴ء کی ’’ہیپی نیو ایئر‘‘ ہے۔
’کنگ‘ کے علاوہ ابھیشیک، ترون منسوخانی کی فلم ’’ہاؤس فل ۵‘‘میں نظر آئیں گے، جس میں ان کے ساتھ اکشے کمار، پوجا ہیگڑے، رتیش دیشمکھ اور کرتی کھربندا ہیں۔