بالی ووڈکی معروف اداکارہ رانی مکھرجی کی پیدائش ۲۱؍مارچ۱۹۷۸ءکوممبئی میں ہوئی۔ انہوں نے بالی ووڈ میں اپنےکریئر کا آغاز۱۹۹۷ءمیں ریلیز ہونے والی فلم راجہ کی آئے گی بارات سے کیا۔

بالی ووڈکی معروف اداکارہ رانی مکھرجی کی پیدائش ۲۱؍مارچ۱۹۷۸ءکوممبئی میں ہوئی۔ انہوں نے بالی ووڈ میں اپنےکریئر کا آغاز۱۹۹۷ءمیں ریلیز ہونے والی فلم راجہ کی آئے گی بارات سے کیا۔ اگرچہ یہ فلم ٹکٹ کھڑکی پر ناکام ثابت ہوئی، لیکن رانی اپنے سنجیدہ کردار سے ناظرین کی توجہ اپنی جانب مبذول کرانے میں کامیاب ہوگئیں۔ ۱۹۹۸ءرانی کے کریئرکے لیے ایک اہم سال ثابت ہوا۔ اس سال انہیں عامر خان کے ساتھ غلام اور شاہ رخ خان کےساتھ کچھ کچھ ہوتا ہے میں کام کرنے کا موقع ملا۔ دونوں فلمیں ٹکٹ کھڑکی پر سپر ہٹ ثابت ہوئیں۔ رانی مکھرجی کو کچھ کچھ ہوتا ہے کے لیے بہترین معاون اداکارہ کے فلم فیئر ایوارڈ نوازا گیا۔ 
۱۹۹۹ءسے۲۰۰۲ءتک کے برس رانی مکھرجی کے کرئیرکیلئے اچھے ثابت نہیں رہے۔ اس دوران رانی مکھرجی کی ہیلو برادر، بادل، ہردل جو پیار کرے گا، حد کر دی آپنے، بچھو، کہیں پیار نہ ہو جائے، چوری چوری چپکے چپکے، بس اتنا ساخواب ہے، پیار دیوانہ ہوتا اور مجھ سے دوستی کروگےفلمیں ریلیز ہوئیں لیکن ٹکٹ کھڑکی پر یہ فلمیں متوقع کامیابی حاصل نہ کر سکیں۔ ۲۰۰۲ءمیں یش راج بینر تلے ریلیز ہونےوالی فلم ساتھیا رانی مکھرجی کے کرئیر کی ایک اور ہٹ فلم ثابت ہوئی۔ اس فلم میں وویک اوبرائے کے ساتھ رانی کی جوڑی کو کافی پسند کیا گیا تھا۔ رانی کو ایک بار پھر کنگ خان شاہ رخ خان کے ساتھ ۲۰۰۳ءمیں ریلیز ہونے والی فلم چلتے چلتے میں کام کرنے کا موقع ملا۔ یہ فلم بھی سپرہٹ ثابت ہوئی۔ ۲۰۰۴ءرانی کےکرئیر کیلئے ایک اہم سال ثابت ہوا۔ اس سال ان کی یووا، ہم تم اور ویر زارا جیسی فلمیں ریلیز ہوئیں۔ ان تمام فلموں میں، رانی نے اپنی کثیر جہتی صلاحیتوں کا مظاہرہ کیا اور اپنے ادا کردہ کرداروں کے ذریعے ناظرین کو مسحور کر دیا۔ ۲۰۰۵ءمیں ریلیز ہونے والی فلم ’بلیک‘ کا شمار رانی مکھرجی کے کریئر کی اہم ترین فلموں میں ہوتا ہے۔ سنجے لیلا بھنسالی کی ہدایت کاری میں بننے والی اس فلم میں رانی مکھرجی کو صدی کے میگا اسٹار امیتابھ بچن کے ساتھ کام کرنے کا موقع ملا۔ رانی نے اپنی ٹھوس اداکاری سے نہ صرف شائقین بلکہ ناقدین کے بھی دل جیت لئے۔ 
۲۰۰۵ءمیں ریلیز ہونے والی فلم بنٹی اور ببلی رانی مکھرجی کے کریئرکی ایک اور سپر ہٹ فلم ثابت ہوئی۔ یش راج بینر تلے بننے والی اس فلم کے ذریعےرانی مکھرجی اور ابھیشیک بچن کی جوڑی نے اپنےکارناموں سے ناظرین کو خوب ہنسایا۔ ۲۰۰۶ءمیں رانی مکھرجی کو ایک بار پھر امیتابھ بچن کےساتھ فلم بابل میں کام کرنے کا موقع ملا۔ گو کہ روی چوپڑا کی ہدایت کاری میں بنی یہ فلم ٹکٹ کھڑکی پر کچھ زیادہ کامیاب نہیں ہو سکی لیکن رانی کی اداکاری کو ناظرین نے ضرور پسندکیا۔ اسی سال رانی کی کرن جوہر کی ہدایت کردہ فلم کل ہو نا ہو ریلیز ہوئی جو ٹکٹ کھڑکی پر ہٹ ثابت ہوئی۔ ۲۰۰۷ءسے ۲۰۱۰ءتک کا وقت ایک بار پھر رانی مکھرجی کے کرئیر کے لیے برا وقت ثابت ہوا۔ اس عرصے کے دوران ان کی تارا رم پم، لاگا چنری میں داغ، تھوڑا پیار تھوڑا جادو، ساوریہ، لک بائی چانس، دل بولے ہڑپہ ریلیزہوئیں لیکن یہ باکس آفس پر فلاپ ثابت ہوئیں۔ رانی کو مختلف کیٹیگریز میں ۷؍ بار فلم فیئر ایوارڈ سے نوازا جا چکا ہے۔ رانی نے مشہورفلمساز آدتیہ چوپڑا سے۲۰۱۴ءمیں شادی کی۔ اسی سال رانی کی فلم مردانی ریلیز ہوئی جس میں انہوں نے اپنی زبردست اداکاری سے سامعین کو مسحور کیا۔ اس کے بعد رانی نےہچکی اور مردانی۲؍ جیسی کامیاب فلموں میں کام کیا۔ ۲۰۲۳ءمیں رانی مکھرجی کی ’مسز چٹرجی ورسیز ناروے‘ ریلیز ہوئی جو کافی پسند کی گئی۔