ہالی ووڈ کا اسٹوڈیو `ایم جی ایم (میٹرو- گولڈون-میئر) پانچ ارب ڈالر سے زیادہ قیمت پر فروخت کیا جا رہا ہے۔ یہ وہی اسٹوڈیو ہے جو جیمس بانڈ اور ہوبٹ جیسی فرنچائز فلمیں بنا چکا ہے۔

 ہالی ووڈ کا اسٹوڈیو `ایم جی ایم  (میٹرو- گولڈون-میئر) پانچ ارب ڈالر سے زیادہ قیمت پر فروخت کیا جا رہا ہے۔ یہ وہی اسٹوڈیو ہے جو جیمس بانڈ اور ہوبٹ جیسی فرنچائز فلمیں بنا چکا ہے۔گزشتہ برسوں میں اسے متعدد مرتبہ فروخت کرنے کی کوشش کی جا چکی ہے۔ آخری مرتبہ رواں سال جنوری میں اسے نیٹ فلکس اور ایپل سمیت کئی دیگر کمپنیوں کو فروخت کرنے کی کوشش کی گئی تھی اور اس حوالے سے ابتدائی بات چیت بھی ہوئی تھی۔ تاہم قیمت زیادہ ہونے کے سبب معاملہ آگے نہ بڑھ سکا۔انٹرٹینمنٹ مارکیٹ میں اسٹریمنگ کمپنیز کے آنے سے نہ صرف اچھا بزنس کرنے والے ڈراموں اور فلموں کی مانگ بڑھی ہے بلکہ ایسی فرنچائزیز کی طلب میں بھی اضافہ ہو رہا ہے جس کے نتیجے میں طویل عرصے تک منافع کمایا جاسکے۔اس صورتِ حال میں `ایم جی ایم  جیسے ہالی ووڈ کے پرانے اسٹوڈیو کی اہمیت اور بڑھ جاتی ہے جس کے پاس چار ہزار فلمی ٹائٹلز اور۱۷؍ ہزار گھنٹوں کے دورانیے پر مشتمل ٹی وی پروگرامنگ کی لائبریری ہے۔ ایم جی ایم کی اس لائبریری میں `جیمس بونڈ  اور `دی ہوبٹ جیسی ہالی ووڈ بلاک بسٹر فرنچائزیز کے علاوہ `ہینڈ میڈز ٹیل جیسے مشہور ٹی وی ڈرامے بھی شامل ہیں۔  گزشتہ سال `ایم جی ایم کو اس لائبریری سے ڈیڑھ ارب ڈالر ریونیو حاصل ہوا تھا۔ جیمس بانڈ ہالی  ووڈ کی تاریخ کی پانچویں سب سے قیمتی فرنچائز ہے جس کی اب تک آنے والی۲۴؍ فلمیں سات ارب ڈالرز کما چکی ہیں۔ ہالی  ووڈ کی تاریخ کی دیگر منافع بخش ترین فرنچائزز میں بالترتیب ماروول، اسٹار وارز، ہیری پوٹر اور اسپائیڈر مین شامل ہیں۔۱۹۲۴ء میں قائم ہونے والا `ایم جی ایم اسٹوڈیو اس سے قبل بھی کئی بار فروخت ہو چکا ہے اور ہر دور میں ہی اس کے کریڈٹ پر معروف اور بلاک بسٹرز فلمیں رہی ہیں۔تاحال یہ واضح نہیں کہ اس بار اس اسٹوڈیو کو کون خریدے گا۔