کوئی بھی فلم کئی عناصر سے مل کر بنتی ہےلیکن جب اس کے تمام عناصر متوازن ہوں تو وہ فلم ہمیشہ یاد رکھی جاتی ہے۔ ایسی ہی ایک فلم شعلے بھی ہے۔

کوئی بھی فلم کئی عناصر سے مل کر بنتی ہےلیکن جب اس کے تمام عناصر متوازن ہوں تو وہ فلم ہمیشہ یاد رکھی جاتی ہے۔ ایسی ہی ایک فلم شعلے بھی ہے۔ فلم شعلےکے دیگر شعبوں کی طرح اس کاہر کردارآج تک لوگوں کے ذہنوں میں جیسے مجسم ہوگیا ہے، پھر چاہے وہ چھوٹے سے چھوٹا کردارہی کیوں نہ ہو۔ ایسا ہی ایک چھوٹا سا کردارفلم کےسب سے اہم کردارامجدخان یعنی گبر سنگھ کے گینگ میں موجود ایک خاص ڈاکوسانبھا کا تھا جسے اداکارمیک موہن نےاپنے منفرد انداز میں ادا کیا ہے۔ یوں تومیک نےاپنے ۴۶؍سالہ طویل فلمی کریئرمیں ۲۰۰؍ سےزائد فلموں میں ویلن کا کر دار کیاہےلیکن فلمی دنیا اور سنیمابین اُنہیں سانبھا کےفلمی نام سے ہی یاد کرتے ہیں۔ 
 ان کا اصل نام موہن ماکیجانی تھا لیکن انہیں سب ہی میک موہن کے نام سے ہی جانتے ہیں۔ میک موہن۲۴؍اپریل ۱۹۳۸ءکو برٹش راج میں کراچی میں پیدا ہوئے تھے۔ وہ کرکٹر بننے ممبئی آئے لیکن تھیٹر سے جڑ گئے اور پھر بالی ووڈاداکاربن گئے۔ انہوں نے یہاں فلمالیہ اسکول آف ایکٹنگ سے اداکاری کی تربیت حاصل کی تھی۔ میک موہن نےہدایت کار چیتن آنند کے اسسٹنٹ کے طور پر اپنا فلمی سفر شروع کیا۔ اسکے بعد ۱۹۶۴ء کی فلم حقیقت سے اداکاری کا سفر شروع کیا۔ میک کی آخری ریلیز ہندی فلم فلمساز اشونی دھیر کی فلم ’اتیتھی تم کب جاؤ گے‘ تھی جس میں وہ بطور مہمان اداکار نظر آئے تھے۔ 
 ہندی فلموں کے علاوہ انہوں نےبھوجپوری، گجراتی، ہریانوی، مراٹھی، پنجابی، بنگالی اور سندھی فلموں میں بھی اپنی اداکاری سے جادو جگایا۔ انہوں نے اڑیہ کے علاوہ تمام ہندوستانی زبانوں میں ڈائیلاگ اداکئےہیں۔ اس کے علاوہ انہوں نے انگریزی، روسی اور ہسپانوی زبان کی فلموں میں بھی کام کیا ہے۔ وہ واحد اداکار ہیں جن کا اصلی نام ’میک‘ کئی فلموں میں ان کے کردار کا نام رکھا گیا ہے۔ 
 جسمانی اعتبار سے میک کی باڈی یا آواز ایک بالی ووڈویلن کی طرح نہ ہونے کے باوجود میک نے سپرسٹار امیتابھ بچن کے ساتھ زنجیر، ڈان، ستےپہ ستا، کالا پتھراور دوستانہ جیسی کئی ہٹ فلموں میں ویلن کا کرداراداکیا جواس بات کا ثبوت ہیں کہ۷۰ءکی دہائی میں وہ کس قدر مقبول تھے۔ 
 بہت کم لوگ اِس بات سے واقف ہیں کہ میک بالی وڈ ہیروئین روینا ٹنڈن کے ماموں بھی تھے۔ میک موہن نے ۱۹۸۶ء میں منی نامی خاتون سے شادی کی تھی جن سےان کی دو بیٹیاں منجری ماکیجانی، ونتی ماکیجانی اور ایک بیٹا وکرانت ماکیجانی ہیں ۔ میک موہن کی بیوی آیورویدک ڈاکٹر ہیں۔ جب میک موہن کے والد کوجوہو میں واقع آروگیہ ندھی اسپتال میں داخل کیا گیا تو پہلی مرتبہ ان کی ملاقات منی سے ہوئی تھی اور تعلقات بڑھتے بڑھتے شادی پر منتج ہوئے۔ پروفیشنل رائٹر کے نیلیش راجے کے ذریعہ لئے گئے انٹرویو سے معلوم ہوتا ہے کہ میک موہن کو تحریری اور زبانی انگریزی پر عبور حاصل تھا۔ اخباروں کو تفصیل سے پڑھنے کے علاوہ انہیں مشہور انگریزی میگزین ریڈرز ڈائجسٹ پڑھنا پسند بہت تھا۔ ان کے دائیں پھیپھڑے میں پھوڑا ہوگیا تھا جو بڑھتے بڑھتے کینسر بن گیا۔ اسی کینسر کے سبب وہ ۱۰؍مئی ۲۰۱۰ء کو ۷۲؍سال کی عمر میں اس دنیا سے رخصت ہوگئے۔