راجپال یادو نے بالی ووڈ میں اپنے کریئر کا آغاز ۱۹۹۹ء میں فلم ’دل کیا کرے‘ سے کیا۔ ابتدائی دور میں انہیں فلموں میں چھوٹے کردارملے لیکن انہیں انڈسٹری میں حقیقی پہچان ولن کے کردار سے ملی۔

اپنی شاندار کامیڈی سے لوگوں کا دل جیتنے والے تجربہ کار بالی ووڈ اداکار راجپال یادوکے چاہنے والوں کی کوئی کمی نہیں۔ ان کی پیدائش ۱۶؍مارچ ۱۹۷۱ءکواتر پردیش کےشاہجہاں پور ضلع میں ہوئی۔ انہوں نے اپنی تعلیم شاہجہاں پور سے حاصل کی۔ اپنی تعلیم مکمل کرنے کے بعد، انہوں نے ایک ڈرامہ تھیٹر میں شمولیت اختیار کرلی۔ اس کے بعد وہ تھیٹر کی تربیت لینے کے لیے ۱۹۹۲ء میں لکھنؤ آئے۔ یہاں انہوں نے بھارتندو ناٹیہ اکیڈمی میں داخلہ لیا۔ راجپال نے یہاں دو سال ٹریننگ لی اور اس کے بعد وہ ۱۹۹۴ءسے ۱۹۹۷ء تک نیشنل اسکول آف ڈرامہ، دہلی میں رہے۔ ۱۲؍ ویں تک تعلیم حاصل کرنے کے بعد انہوں نے آرڈیننس کلاتھ فیکٹری میں ٹیلرنگ میں اپرنٹس شپ کی لیکن اداکار بننے کی خواہش کے باعث نوکری سے کنارہ کشی اختیار کر لی۔ 
راجپال یادو نے بالی ووڈ میں اپنے کریئر کا آغاز ۱۹۹۹ء میں فلم ’دل کیا کرے‘ سے کیا۔ ابتدائی دور میں انہیں فلموں میں چھوٹے کردارملے لیکن انہیں انڈسٹری میں حقیقی پہچان ولن کے کردار سے ملی۔ انہوں نے۲۰۰۰ءمیں ریلیز ہونے والی رام گوپال ورما کی فلم ’جنگل‘ میں ’سپّا‘ کا کردار ادا کیا تھا۔ اس کردار سے انہیں کافی شہرت ملی، جس کے بعد اداکار کو فلم فیئر کے بہترین منفی کردار کے ایوارڈ سے نوازا گیا۔ اس فلم کے بعد راجپال کے کریئر نے نئی اڑان بھری۔ 
یادونے اپنی فلموں - دل کیا کرے، مست، شول، جنگل، کوئی میرے دل سے پوچھے، تم کو نہ بھول پائیں گے، چور مچائے شور، ایک اور ایک گیارہ، جاسوس: ایک محبت کی کہانی، کیا کول ہیں ہم، میں نے پیارکیوں کیا، اپنا سپنا منی منی، مالا مال ویکلی، بھاگم بھاگ، انڈر ٹرائل، پارٹنر، کریزی۴، بھوت ناتھ، میرے باپ پہلے آپ، بلو، دے دنا دن، کشتی، کھٹا میٹھا، پولیس گیری، رنگریز، کرش۳، میں تیرا ہیرو، پیار تو نے کیا کیا، ریس ایگزٹ ٹائم، گرم مسالہ، ڈھول، ’کمپنی‘، ’ہم کسی سے کام نہیں ‘، ’ہنگامہ‘، ’مجھ سے شادی کروگی‘، ’میں میری پتنی اور وہ‘، ’پھر ہیرا پھیری‘، ’چپ چپ کے‘ اور ‘ بھول بھلیاں ‘ میں اپنی بہترین اداکاری سےلوگوں کے دل جیت لیے۔ اپنی شاندار اداکاری کی وجہ سے انہوں نےفلم فیئر سمیت کئی بڑے ایوارڈز اپنے نام کیے لیکن اپنے کریئر کے آغاز میں انہیں بالی ووڈ میں اپنی شناخت بنانے کے لیے کافی جدوجہد کرنی پڑی تھی۔ انہوں نے دوردرشن کے ٹیلی ویژن سیریل مونگیری کے بھائی نورنگی لال میں اداکاری کی۔ یہ سیریل مونگیری لال کے حسین سپنے کا سیکوئل تھا جو دور درشن پر نشر ہوا تھا۔ وہ منفی کردار کرنے میں کامیاب رہےلیکن بعد میں انہوں نے مزاحیہ کرداروں کو زیادہ اہمیت دی۔ کامیڈی فلموں کے علاوہ، انہوں نے کئی فلموں میں اہم اداکار کے طور پر کام کیا جن میں مادھوری دکشت بننا چاہتی ہوں، لیڈیز ٹیلر، راما راما کیا ہے ڈرامہ، ہیلو! ہم للن بول رہے ہیں، کشتی، مرچ، میں، میری پتنی اور وہ وغیرہ۔ فلم جنگل میں اپنے منفی کردار کے لیے، انہوں نے سنسوئی اسکرین بہترین اداکار کا ایوارڈ جیتا اور اسکرین کے بہترین اداکار کے ایوارڈ کے لیے بھی نامزد ہوئے۔ میں مادھوری دکشت بننا چاہتی ہوں کے لیے انہیں یش بھارتی ایوارڈ سے نوازا گیا۔ انہیں جن پد رتن ایوارڈ سے بھی نوازا گیا ہے۔ راجپال کی پہلی شادی لکھیم پور کی رہائشی کرونا یادو سے ہوئی تھی تاہم ان کی اہلیہ کا بیماری کے باعث انتقال ہو گیا جس کے بعد اداکار نے کناڈا کی رہائشی رادھا یادوسے دوسری شادی کی۔ دونوں کی پہلی ملاقات کناڈا میں ہوئی تھی۔