آج سنیما گھروں میں ریلیز ہونے والی روہت شیٹی کی ’’سنگھم اگین‘‘ اور انیس بزمی کی ’’بھول بھلیاں ۳‘‘، دونوں ہی ناقدین اور ناظرین کو متاثر کرنے میں ناکام ثابت ہوئی ہیں۔

آج سنیما گھروں میں ریلیز ہونے والی دونوں ہی بڑی فلمیں ’’سنگھم اگین‘‘ اور ’’بھول بھلیاں ۳‘‘ شائقین کی امیدوں پر پوری نہیں اتریں۔ ناقدین اور ناظرین کی جانب سے ملنے والے رسپانس کے مطابق دونوں ہی فلمیں اوسط سے کم ہیں۔ جہاں ’’سنگھم اگین‘‘ کو اوسطاً ڈھائی اسٹار ملے ہیں، وہیں ’’بھول بھلیاں ۳‘‘ بھی ڈھائی اسٹار کی حقدار قرار دی گئی ہے۔ روہت شیٹی کی کوپ یونیورس کی سب سے بڑی فلم ’’سنگھم اگین‘‘ میں درجنوں بالی ووڈ ستارے اور سلمان خان ’’دبنگ‘‘ کے اپنے چلبل پانڈے کے کردار میں بھی نظر آرہے ہیں، لیکن مختلف محاذوں پر فلم کمزور ثابت ہوئی ہے۔ فلم ناظرین کا ایک بڑا طبقہ ’’سنگھم اگین‘‘ کو ’’انٹرٹینر‘‘ ضرور قرار دے رہا ہے مگر لاجک، کہانی اور ٹویسٹ کے محاذ پر یہ بری طرح ناکام ہوئی ہے۔ 
دوسری جانب، انیس بزمی کی ’’بھول بھلیاں ۳‘‘ بھی مختلف محاذوں پر ناکام ثابت ہوئی ہے۔ ناظرین نے اسے مایوس کن قرار دیا ہے۔ سوشل میڈیا پر درجنوں ناظرین نے لکھا کہ فلم سے کافی امیدیں تھیں مگر اس میں ہارر عناصر کہیں بھی نظر نہیں آئے۔
خیال رہے کہ دونوں ہی فلموں میں بڑی اسٹار کاسٹ ہیں۔ روہت شیٹی اور انیس بزمی کا شمار بہترین ہدایتکاروں میں ہوتا ہے، اس کے باوجود دونوں ہی فلمیں ناظرین کو متاثر کرنے میں ناکام ثابت ہوئی ہیں۔ باکس آفس جنگ کون سی فلم جیتے گئی، یہ آئندہ چند دنوں میں واضح ہوجائے گا۔