ہندوستانی سنیما کی اسٹار اداکارہ سمیتا پاٹل نے اپنی بہترین اداکاری سے متوازی فلموں کے ساتھ ساتھ کمرشیل فلموں میں ناظرین کے بیچ اپنی خاص جگہ بنائی۔

ہندوستانی سنیما کی اسٹار اداکارہ سمیتا پاٹل نے اپنی بہترین اداکاری سے متوازی فلموں کے ساتھ ساتھ کمرشیل فلموں میں ناظرین کے بیچ اپنی خاص جگہ بنائی۔ ۱۷؍ اکتوبر ۱۹۵۵ء کو پونے شہر میں پیدا ہونے والی سمیتا پاٹل نے اپنی تعلیم مہاراشٹر سے مکمل کی۔ ان کے والد شیواجی رائو پاٹل مہاراشٹر حکومت میں وزیر تھے جبکہ ان کی والدہ سماجی کارکن تھیں۔ کالج کی تعلیم مکمل کرنے کے بعدوہ مراٹھی ٹیلی ویژن میں بطورنیوزریڈر کام کرنے لگی تھیں۔ اس دوران ان کی ملاقات معروف فلمساز و ہدایتکار شیام بینیگل سے ہوئی۔ 
 شیام بینگل ان دنوں اپنی فلم ’ چرن داس چور‘ بنانے کی تیاری کر رہےتھے۔ شیام بینیگل کو سمیتا پاٹل میں ایک ابھرتی ہوئی اداکارہ نظر آئی اور انہوں نے اپنی فلم ’چرن داس چور‘ میں سمیتا کو ایک چھوٹا سا کردار دیا۔ فلم ’منتھن‘ اور ’بھومیکا‘ میں سمیتا کے ساتھ نصیرالدین شاہ، شبانہ اعظمی، امول پالیکر اورامریش پوری جیسےمشہوراداکارتھے۔ 
 ’بھومیکا‘ سےسمیتا پاٹل کا جو سفر شروع ہوا وہ ’چکرا‘، ’نشانت‘، ’آکروش‘، ’گدھ‘، ’البرٹ پنٹو کو غصہ کیوں آتا ہے‘ اور ’مرچ مصالہ‘ جیسی فلموں تک جاری رہا۔ ۱۹۸۰ء میں ریلیز ہونے والی فلم’چکرا‘ میں سمیتا پاٹل نے جھوپڑپٹی میں رہنے والی خاتون کا کردار ادا کیا جس کیلئے انہیں دوسری مرتبہ قومی ایوارڈ سے سرفراز کیا گیا۔ 
 ۸۰ء کے عشرے میں سمیتا پاٹل نے کمرشیل فلموں کی طرف اپنا رخ کیا اور اس دوران انہوں نے سپراسٹار امیتابھ بچن کے ساتھ ’نمک حلال‘ اور ’شکتی ‘ جیسی سپرہٹ فلموں میں کام کیا جس کے بعد سمیتا پاٹل نے کمرشیل فلموں میں بھی کامیابی حاصل کی۔ ۱۹۸۵ء میں ہندوستانی سنیمامیں انہیں شاندار اداکاری کی وجہ سے پدم شری ایوارڈ سے نوازا گیا۔ ہندی فلموں کے علاوہ سمیتا نے مراٹھی، گجراتی، تیلگو، بنگلہ، کنڑ اور ملیالم فلموں میں بھی اپنی اداکاری کے جوہر دکھائے۔ 
 اس کے علاوہ سمیتا کو عظیم فلمساز ستیہ جیت رے کے ساتھ بھی کام کرنے کا موقع ملا۔ منشی پریم چندر کی کہانی پر مبنی ٹیلی فلم ’سدگتی ‘ کو آج بھی یاد کیا جاتا ہے۔ اپنی بہترین ادکاری سے ۲؍ عشروں تک ناظرین کے دلوں میں چھانے والی اداکارہ سمیتا پاٹل محض ۳۱؍ سال کی عمر میں ۱۳؍دسمبر ۱۹۸۶ء کو اس دنیا سے رخصت ہو گئیں۔ ان کی موت کے بعد ۱۹۸۸ء میں ان کی فلم ’وارث‘ ریلیز ہوئی جو سمیتا پاٹل کے فلمی کریئر کی اہم فلموں میں سے ایک تھی۔