بلومبرگ کی تازہ رپورٹ کے مطابق سیلینا گومیز کے اثاثوں کی مالیت ۳ء۱؍ بلین ڈالر سے تجاوز کرگئی ہے۔ اس طرح وہ امریکہ کی سب سے کم عمر ’’سیلف میڈ‘‘ ارب پتی بن گئی ہیں۔ ان کی آمدنی کا بڑا حصہ ان کے میک اپ برانڈ ’’ریر بیوٹی‘‘ سے آتا ہے۔ علاوہ ازیں، وہ گلوکاری اور اداکاری کے میدان میں بھی فعال ہیں۔

سیلینا گومیز نے کم عمر میں کئی نمایاں کارنامے انجام دیئے ہیں۔ وہ اب دنیا کی کم عمر ترین ارب پتی بن گئی ہیں۔ بلومبرگ کے مطابق ۳۲؍ سالہ اداکارہ، گلوکارہ، سرمایہ کار اور کاروباری شخصیت سیلینا گومیز نے ایک اہم مالی سنگ میل عبور کیا ہے۔ وہ امریکہ میں کم عمر ترین ’’سیلف میڈ بلینیئر‘‘ بن گئی ہیں جن کے اثاثوں کی مجموعی مالیت ۳ء۱؍ بلین ڈالر ہے۔ خیال رہے کہ سیلینا کی آمدنی کے مختلف ذرائع ہیں جیسے گلوکاری، اداکاری اور ماڈلنگ۔ تاہم، انہیں سب سے زیادہ آمدنی ان کے ۵؍ سال پرانی میک اپ لائن سے ہوئی ہے۔ نوعمروں میں ان کے میک اپ کافی مقبول ہیں۔
یہی نہیں سیلینا گومیز کے بیوٹی برانڈ کے شیئر کی قیمتوں میں اضافہ ہوا ہے۔ ونڈر مائنڈ اور دیگر جائیداد کی قیمتیں بھی بڑھی ہیں۔ انہیں سوشل میڈیا پر پوسٹ کرنے کا بھی معاوضہ ملتا ہے۔ انسٹاگرام پر ان کے ۴۲۴؍ ملین فالوورز ہیں۔ کرسٹیانو رونالڈو (۶۳۸؍ ملین) اور لیونل میسی (۵۰۴؍ ملین) کے بعد وہ تیسری سب سے زیادہ فالو کی جانے والی شخصیت ہیں۔ انہوں نے حال ہی میں پیو ما اور کوچ کے ساتھ بالترتیب ۳۰؍ ملین اور ۱۰؍ ملین ڈالر کا کاروباری معاہدہ کیا ہے۔ ان کی بیوٹی لائن ’’ریر بیوٹی‘‘ ریحانہ کےبرانڈ اور کاردشین کے بعد سب سے زیادہ مقبول ہے۔ حال ہی میں سیلینا نے اپنی بیوٹی لائن کو مستحکم کرنے کیلئے سرمایہ کاروں سے رابطہ کیا ہے جس کے بعد ان کی یہ کمپنی ۲؍ بلین ڈالر مالیت کی ہوگئی ہے۔ 
یاد رہے کہ ۲۰۲۰ء میں گومیز نے انکشاف کیا تھا کہ وہ بائی پولر ڈس آرڈر کی مریضہ ہیں، اس کے بعد ایک انٹرویو میں انہوں نے کہا تھا کہ وہ ایسی کمپنی کے ساتھ معاہدہ کریں گی جو خیراتی اور دماغی صحت کیلئے عطیہ کرتی ہیں۔ اس مقصد کے تحت انہوں نے ۱۰۰؍ ملین ڈالر اکٹھا کرنے کیلئے ’’ریر امپیکٹ فنڈ‘‘ شروع کیا ہے تاکہ لوگوں کو ذہنی صحت کی خدمات تک رسائی حاصل کرنے میں مدد ملے۔ سیلینا گومیز کو ’’اونلی مرڈرز ان دی بلڈنگ‘‘ کے ایک سیزن کیلئے ۶؍ ملین ڈالر ملتے ہیں۔