مالون کے قریب سمندر کے اندر ایک جزیرے پر واقع اس قلعہ میں شیواجی کے پیروں کے نشان دیکھے جاسکتے ہیں، ڈائیونگ اور اسنورکلنگ کا بھی موقع۔

سندھودرگ قلعہ تاریخ اور مہم جوئی کے شوقین افراد کے لیے ایک بہترین سیاحتی مقام ہے۔ چھترپتی شیواجی مہاراج نے ۱۷؍ویں صدی میں اس قلعے کی تعمیر کروائی تھی تاکہ مراٹھا بحریہ کو دشمنوں کے حملوں سے محفوظ رکھا جا سکے۔ یہ قلعہ نہ صرف ایک تاریخی ورثہ ہے بلکہ سیاحوں کے لیے ایک حیرت انگیز تفریحی مقام بھی ہے۔ 
سیاحوں کے لیے اہم خصوصیات
 یہ قلعہ بحر عرب کےبیچ میں ایک جزیرے پر واقع ہے، جہاں سےسمندر اور کوکن ساحل کے شاندار نظارے دیکھنے کو ملتے ہیں۔ ۱۶۶۴ءتا ۱۶۶۷ءمیں تعمیر ہونے والا یہ قلعہ خاص طور پر پرتگالیوں اور برطانوی حملوں سے بچاؤ کے لیے بنایا گیا تھا۔ قلعے کا رقبہ۴۸؍ایکڑ میں پھیلا ہوا ہے اور اس کی دیواریں ۳۰؍فٹ بلند ہیں، جو صدیوں سےسمندری لہروں کا مقابلہ کر رہی ہیں۔ اس کا مرکزی دروازہ یعنی دہلی دروازہ اس انداز میں بنایاگیاہے کہ دشمنوں کے لیے اسے تلاش کرنا مشکل ہو جاتا تھا۔ قلعے کے اندر چھترپتی شیواجی مہاراج کے ہاتھوں اور پاؤں کے نشانات اب بھی پتھروں پرموجود ہیں، جو سیاحوں کے لیے ایک بڑی کشش ہیں۔ 
ایڈونچر اور سرگرمیاں 
یہاں کا پہلا ایڈونچرکشتی کی سواری ہے کیوں کہ سیاح مالون جیٹی سے کشتی کے ذریعے ہی اس قلعے تک پہنچ سکتے ہیں۔ – قلعے کے آس پاس کا سمندر مرجان کی چٹانوں اور سمندری حیات کے لیے مشہور ہے، جہاں سیاح اسکوبا ڈائیونگ اور اسنورکلنگ کا لطف اٹھا سکتےہیں۔ قلعے میں چہل قدمی کرتے ہوئے اس کے ماضی کو محسوس کیاجا سکتا ہےجس سے آپ کوٹریکنگ کا لطف ملے گا۔ 
 کیسے جائیں ؟
 سندھودرگ قلعہ مہاراشٹر کے مالون شہر کے قریب ایک جزیرے پر واقع ہے اور وہاں پہنچنے کے لیے کشتی کا سفر کرنا ضروری ہوتا ہے۔ یہاں پہنچنے کے لیے مختلف راستے دستیاب ہیں :
ہوائی سفر: یہاں کاقریب ترین ہوائی اڈہ: دابولِم ایئرپورٹ، گوا میں واقع ہے جو یہاں سےتقریباً ۱۳۰؍کلومیٹر دور ہے۔ دابولِم ایئرپورٹ ملک کےبڑے شہروں جیسے ممبئی، دہلی، بنگلورو اور حیدرآباد سے جڑا ہوا ہے۔ ایئرپورٹ سے ٹیکسی یا بس کے ذریعے مالون تک پہنچا جا سکتا ہے، جس میں تقریباً۳؍تا ۴؍گھنٹے لگتے ہیں۔ 
ٹرین سے: یہاں کاقریب ترین ریلوےاسٹیشن کُدال ریلوے اسٹیشن ہے جو قلعہ سےتقریباً ۳۰؍کلومیٹر دور ہے۔ کُدال اسٹیشن کوکن ریلوے کا ایک اہم اسٹیشن ہے، جہاں ممبئی، پونے، گوا، بنگلورو اور دیگر شہروں سے ٹرینیں آتی ہیں۔ اسٹیشن سے ٹیکسی یا بس کے ذریعے مالون پہنچا جا سکتا ہے، جس میں تقریباً۴۵؍تا ۶۰؍منٹ لگتے ہیں۔ 
سمندری راستے سے: سندھودرگ قلعہ سمندر میں ایک جزیرے پر واقع ہے، اس لیے وہاں پہنچنے کے لیے کشتی کا استعمال کرنا ضروری ہے۔ مالون جیٹی سے تقریباً ۱۵؍تا ۲۰؍منٹ کی کشتی سواری کے بعد قلعے تک پہنچا جا سکتا ہے۔ کشتی کاکرایہ۱۰۰؍تا۲۰۰؍ روپےفی شخص ہوتا ہے جو کہ موسم کے لحاظ سے بدل سکتا ہے۔ یہ کشتیاں صبح ۹؍بجےسےشام ۵؍بجےتک دستیاب ہوتی ہیں۔ اس میں بھی موسم کی صورتحال کے مطابق وقت میں فرق ہو سکتا ہے۔ برسات کے موسم (جون-ستمبر) میں کشتی کی سروس عام طور پر بند رہتی ہے۔ 
سڑک سے:سڑک کے ذریعہ آپ بس یا کار میں سفر کرتے ہوئے یہاں پہنچ سکتے ہیں۔ سندھودرگ قلعہ مہاراشٹر اور گوا سے آسانی سے سڑک کے ذریعے قابلِ رسائی ہے۔ ممبئی سے یہاں تک کافاصلہ تقریباً۵۳۰؍ کلومیٹرہے جو آپ نیشنل ہائی وے ۶۶؍کے ذریعے طے کرسکتے ہیں۔ پونے سے یہاں کا فاصلہ تقریباً ۴۰۰؍ کلو میٹر ہے جبکہ گوا سےفاصلہ تقریباً ۱۳۰؍کلومیٹر ہے۔ ایم ایس آر ٹی سی (مہاراشٹر اسٹیٹ روڈ ٹرانسپورٹ کارپوریشن) اور پرائیویٹ بسیں ممبئی، پونے اور گوا سے مالون کے لیے چلتی ہیں۔ نجی کار یا ٹیکسی کے ذریعے بھی مالون پہنچا جا سکتا ہے۔