یہاں ساحل سمندر سے لےکرایک جزیرہ اورجھیلیں ہیں، کلچرل سینٹر میں یہاں کی ثقافت اور مچھلی گھر میں مختلف مچھلیاں دیکھی جاسکتی ہیں۔

ورکلا جنوبی کیرالہ کے ساحل پر واقع ایک خوبصورت شہرہے۔ یہ بحیرہ عرب پر واقع ہے اور اپنی قدرتی خوبصورتی کے لیے بہت مشہورہے۔ اگر آپ کیرالہ کے سفر پر ہیں تو آپ کو ایک بار ورکلا شہر ضرورجانا چاہیے۔ یہاں آپ ساحل سمندر سے لطف اندوز ہوسکتے ہیں۔ یہ ریاست کیرالہ کا ایک بہترین سیاحتی مقام سمجھا جاتا ہے۔ ورکلاکے علاقےکی خاصیت یہ ہے کہ اس خطے کے آس پاس بہت سے جزیرے ہیں جو آپ کو ایک ایسے معاشرےکی جھلک پیش کرتےہیں جو آج بھی جدید زندگی سےدور ہے۔ ورکلا ایک ایسا شہر ہے جس میں ہر سیاح کے لیے کچھ نہ کچھ ہوتا ہے۔ خواہ وہ مذہبی رجحان رکھتا ہو، ایڈونچر کا شوقین ہو یا فطرت سے محبت کرنے والا۔ ورکلا آپ کو مایوس نہیں کریں گے۔ 
ورکالا بیچ میں تفریح
ورکلامیں آپ کو ورکلا بیچ ضرور جانا چاہیےجو تقریباً۲۰؍کلومیٹر طویل ہے۔ مقامی لوگوں کا ماننا ہےکہ اس ساحل کا پانی مقدس ہے جس سےکئی بیماریوں کا علاج کیا جا سکتا ہے۔ اس لیے اس ساحل کی اپنی اہمیت ہے۔ آپ ساحل سمندرکے قدیم پانی میں تیر سکتے ہیں اور ماہی گیری میں مشغول ہوسکتے ہیں یا قدرتی آبشار میں ڈبکی لگا سکتے ہیں جو آپ کو بے پناہ جوش و خروش اور خوشی دیتا ہے۔ 
پونمتھرو تھو جزیرہ
اگر آپ ورکلا میں جنگلی حیات کو دیکھنا چاہتے ہیں تو آپ کو پونمتھروتھو جزیرہ ضرور جانا چاہیے۔ یہ کیرالہ کے سب سے خوبصورت جزیروں میں سے ایک ہے۔ اس کا رقبہ تقریباً۵؍ہیکٹرہے۔ یہاں پر خوبصورت جھیلوں کو دیکھنے کے علاوہ آپ یہاں پر غیر ملکی ہجرت کرنےوالے پرندے، نایاب آبی پرندے اور دیگرجنگلی حیات کو بھی آسانی سے دیکھ سکتے ہیں۔ یہ فطرت سے محبت کرنے والوں اور پرندوں کو دیکھنے کے شائقین کے لیے ایک بہترین جگہ ہے۔ 
ورکلا کلچر سینٹر
ورکلامیں روایتی اور جدید ثقافت کا امتزاج ہے جو منفرد طور پر اپنی منفرد خصوصیات کو برقرار رکھتی ہے۔ لہٰذا، اس ثقافت کو تلاش کرنا ورکلا، کیرالہ میں کرنے کیلئےسب سے دلچسپ چیزوں میں سے ایک ہے۔ یہاں کا روایتی فن ریاست کی تاریخ کی عکاسی کرتاہے۔ ورکلا کلچرل سینٹر ہر شام کتھاکلی طرز کے رقص کے ساتھ کلاریپائیٹو پرفارمنس کی میزبانی کرتا ہے، جو آپ کو ایک منفرد تجربہ فراہم کرتا ہے۔ 
پانی کے کھیل
ورکلا کے ساحل کے قریب پانی کے کھیلوں کا لطف اٹھایا جاسکتا ہے۔ چونکہ اس علاقے میں بہت سے ساحل ہیں، آپ یہاں واٹر اسپورٹس کے ذریعے لامحدود تفریح اور سنسنی خیز تجربہ حاصل کر سکتے ہیں۔ یہ ورکلا میں کرنے کے لیے بہترین چیزوں میں سے ایک ہے۔ آپ یہاں جیٹ اسکیئنگ سے لے کربنانا بوٹ کی سواری اور پیرا سیلنگ تک ہر چیزسےلطف اندوز ہوسکتے ہیں۔ پورے جنوبی ہندوستان میں یہ واحدجگہ ہے جہاں سمندر کے ساتھ ساتھ بڑے بڑے پہاڑ ہیں جو ہر آنے والے کو مسحور کردیتے ہیں۔ 
ورکلا ایکویریم
اگر آپ بچوں کے ساتھ ورکلاجا رہے ہیں، تو یہ یقینی طور پر دیکھنے کے لیے ایک بہترین جگہ ہے۔ ایکویریم دو ساحلوں، بلیک بیچ اور اوڈیم بیچ کے درمیان واقع ہے، جو اسے مزیددلکش بناتا ہے۔ ورکلا میں تفریحی چیزوں میں سے ایک ایکویریم میں مچھلیوں کی مختلف اقسام کو دیکھنا ہے۔ 
ورکلا سرنگ
ورکلا ٹنل۱۸۶۷ءمیں اس وقت کے دیوان سر مادھوا راؤ نے تراونکورکے دیوان کے ذریعہ بنوائی تھی۔ ورکلا ٹنل کو مکمل ہونے میں ۱۴؍سال لگے، یہ ایک۹۲۴؍فٹ لمبی سرنگ ہے، جسے تاجروں کیلئے ترواننت پورم کی طرف سفرکیلئے بنایا گیا تھا، اب سیاحتی مقام ہے۔ 
کپل جھیل
کپل جھیل، گھنے ناریل کے درختوں، کھجور کے درختوں اور ایک پرامن ماحول سے گھری ہوئی ہے، آپ جھیل کے قریب واقع بوٹ کلبوں سےکرائے پر لے کر پیڈل بوٹنگ کا لطف اٹھا سکتے ہیں۔ پل اور چمکتے پانی کے دلکش نظارےبہت دلکش ہوتے ہیں۔ ورکلا کیرالہ کی راجدھانی ترواننت پورم سے صرف۴۰؍کلومیٹر دور ہے۔