تھانے کے قریب واقع پہاڑی اور جنگلاتی علاقہ یئور نیشنل پارک کا حصہ ہے،یہاں آبشار، ٹریکنگ اور جاگنگ کیلئے مناسب راستہ اور بہت کچھ ہے۔

یئور آبشار تھانے کے علاقے یئور میں واقع ہے جو سنجے گاندھی نیشنل پارک کا حصہ ہے۔ یہ مقام گھنے جنگلات سے گھرا ہوا ہے اور اپنی قدرتی خوبصورتی کیلئے مشہور ہے۔ یئور ہلز کو ’یوگی ہلز‘ اور `’ماما بھانجے ہلز‘ کے نام سے بھی جانا جاتا ہے۔ یہ مقام ممبئی اور تھانے کے مکینوں کیلئے ایک مقبول سیاحتی مقام بن چکا ہے جہاں متعدد ہوٹلز، کلب اور اسپورٹس کلب قائم ہیں ۔ یئور ہلز میں کئی آبشار ہیں جن میں یئور آبشار اپنی خوبصورتی کے لیے مشہور ہے۔ اس آبشار تک پہنچنے کیلئے سنجے گاندھی نیشنل پارک کے گھنے جنگلات سے تقریباً ۱ء۵؍ سے۲؍ گھنٹے کی ٹریکنگ کرنی پڑتی ہے۔ یہ ایک موسمی آبشار ہے جو مانسون کے دوران پوری آب و تاب میں ہوتا ہے۔ ہفتہ وار تعطیلات پر یہاں زیادہ بھیڑ ہوتی ہے جبکہ ہفتے کے درمیانی دنوں میں کم رش ہوتا ہے۔ یہ آبشار دوستوں کے ساتھ وقت گزارنے کے لیے ایک بہترین مقام ہے۔ 
یئور آبشار ٹریک
 یئورآبشار تک ٹریکنگ کاراستہ آسان ہے اور نئے ٹریکنگ کرنے والے بھی اسے بآسانی طے کر سکتے ہیں۔ ایک طرف کا سفر تقریباً ۱ء۵؍ سے۲؍گھنٹے میں مکمل ہوتا ہے۔ راستے میں گھنے جنگلات، پیڑ پودے اور چھوٹے پانی کے چشمے ملتے ہیں ۔ اس علاقے میں جنگلی حیات بھی پائی جاتی ہے، جن میں تیندوا بھی شامل ہے، لہٰذا احتیاط ضروری ہے۔ 
یئور کے بارے میں مزید معلومات 
 یئورایک پہاڑی علاقہ ہے جوسنجے گاندھی نیشنل پارک میں واقع ہے ۔ یہ تیندوؤں اور دیگر جنگلی حیات کی موجودگی کیلئے مشہور ہے۔ اسے عام طور پر ’ممبئی کا نیشنل پارک ‘بھی کہا جاتا ہے۔ یئور میں ۶؍ گاؤں ہیں جن کی آبادی کم وبیش۳؍ ہزار نفوس پر مشتمل ہے۔ یہاں کئی بنگلے ہیں جو امیر افراد اور وزراء کی ملکیت ہیں۔ اس علاقے میں ہندوستانی فضائیہ کا ایک اسٹیشن بھی موجود ہے۔ یہاں تک رسائی محکمہ جنگلات کی جانب سے سختی سے کنٹرول کی جاتی ہے اور شام ۸؍ بجے کے بعد کسی بھی گاڑی کو داخلے کی اجازت نہیں ہے۔ یئور ہلز کی صاف ستھری فضا تھانے اورممبئی کے لوگوں کیلئے کشش کا باعث ہے، اور یہ مقام صبح کی سیر، پکنک، ٹریکنگ، پرندوں کی دیکھ بھال اور سائیکلنگ کیلئےمشہور ہے۔ 
 یہاں آنے والے افراد صبح کی سیر کے بعد تازہ ماحول سے لطف اندوز ہوتے ہیں اور مقامی کھانوں جیسے تارری پوہا اور مسل پاؤ سے محظوظ ہوتے ہیں۔ بارش کے موسم میں یہاں کا ماحول اور بھی دلکش ہو جاتا ہے۔ یہاں کی آبادی کی تعلیمی شرح کم ہے لیکن وقت کے ساتھ ساتھ بہتر ہورہی ہے۔ یئور میں رہنے اور کام کرنے والے افراد ہندوستان کے مختلف لسانی گروہوں سے تعلق رکھتے ہیں۔ چونکہ یہاں کی زیادہ تر آبادی قبائلیوں پر مشتمل ہے اس لیے لکڑی کاٹنا اور مقامی پھل بیچنا ان کی آمدنی کے اہم ذرائع ہیں۔ ان کی سالانہ آمدنی تقریباً ۴؍ہزار سے ۶؍ ہزار روپے کے درمیان ہوسکتی ہے۔ اس کے علاوہ، چاول کی کاشت اور قریبی چھوٹے ڈیم میں مچھلی پکڑنا بھی یہاں کے لوگوں کے پیشے ہیں۔ یئور ہلز میں پرندوں کی تقریباً۷۸؍ اقسام اور۱۲؍ مختلف جانوروں کی اقسام پائی جاتی ہیں جن میں تیندوے کی بڑی تعداد بھی شامل ہے۔ یہاں کا قدرتی ماحول اور جنگلی حیات تھانے اور ممبئی کے رہائشیوں پُرسکون اور تازگی بخش ہے۔ 
یئور آبشار تک پہنچنے کا طریقہ
تھانے سے یئور آبشار: تھانے اسٹیشن سے یئور آبشار کا فاصلہ تقریباً ۹ء۵؍کلومیٹر ہے۔ یہاں سے آٹو رکشہ یا ٹیکسی کے ذریعے ۳۰؍ سے ۴۰؍ منٹ میں پہنچا جا سکتا ہے۔ تھانے اسٹیشن سے یئور ہلز کیلئے براہ راست بس سروس بھی موجود ہے۔ 
ملنڈ سے یئور آبشار: ملنڈ سے یئور آبشار کا فاصلہ تقریباً ۱۰؍کلومیٹر ہے۔ یہاں سے آٹو یا ٹیکسی کے ذریعے یئور پہنچا جا سکتا ہے۔ تھانے ریلوے اسٹیشن یئور آبشار کے قریب ترین اسٹیشن ہے۔