یاد کیجئے ہماری توانائی ہمارا ایمان تھا۔ ہماری عزت ہمارا دین تھا۔ ہمارا اصل سہارا ہمارا پروردگار تھا۔ ہمارا قانون ہمارا قرآن تھا۔ ہمارے امام، ہمارے رسول عربیؐ تھے۔

ہم مسلمان، جی ہاں ہم مسلمان، یاد کیجئے اور غور کیجئے کہ ہمارے بارے میں ملک شام اور اس کے چمن زاروں سے پوچھو، اور اس کے زرخیز و شاداب باغات و زمینوں سے دریافت کرو، اندلس اور اس کے گلستانوں و مرغزاروں، مصر اور اس کی وادیوں، جزیرئہ عرب اور اس کی وسعتوں، دنیا اور دنیا والوں سے معلوم کرلو، افریقہ اور اس کے میدانوں، عجم کی سرسبز مٹی، قفقاز کی بلند چوٹیوں، گنگا کے کناروں، لوار کے ساحلوں، ڈینیوب کی وادیوں سے پوچھ لو اور ’’زمین‘‘ کی ہر سرزمین، اور زیرآسمان بسنے والے ہر متنفس سے معلوم کرلو، ان سب کو ہماری جاں بازیوں، جواں مردیوں، قربانیوں، لائق ستائش و قابلِ فخر علم و فن کے کارناموں کی خبر ہے… ہم مسلمان ہیں !
ہم مسلمان! کیا شرافت و کامرانی کے باغیچوں کی ہمارے خون سے آبیاری نہیں ہوئی؟ کیا شجاعت و بہادری کے خیابانوں کو ہمارے شہیدوں نے آراستہ نہیں کیا؟ کیا دنیا نے ہم سے زیادہ فراخ دل، بردبار، کرم گستر، ہم سے زیادہ نرم مزاج، محبت و شفقت و رحم کرنے والا، اور ہم سے زیادہ اعلیٰ، برتر، عظیم ترقی یافتہ، علم دوست اور باخبر قوم کبھی کہیں دیکھی ہے!
ہم ہی نے ہدایت نما، مشعل نور اور روشنی کا مینار ایستادہ کیا۔ جب انسانی بستی جہالت و ناخواندگی کی تاریکیوں اور گھٹاٹوپ اندھیروں میں بھٹک رہی تھی، ہم نے اس زمین کے باسیوں سے کہا: دیکھو، راستہ یہ ہے!
ہم ہی نے اس وقت عدل و انصاف قائم کیا، جب ہر قوم نے ظلم وسرکشی کا علم بلند کیا۔ ہم ہی نے علم و دانش کدے تعمیر کئے جبکہ لوگوں نے اِسے شہرپناہ سے باہر کر دیا۔ ہم ہی نے سماجی برابری اور مساوات کا اعلان کیا جبکہ نوعِ انسانی اپنے بادشاہوں کے سامنے سجدہ ریز اور اپنے آقائوں کو دیوتا بنائے ہوئے تھی، ہم نے ایمان کی حرارت سے دلوں میں زندگی دوڑا دی اور نورِ علم سے عقل کو روشن کیا اور عالمِ انسانی کو آزادی و تہذیب، ترقی و کامرانی اور خوشحالی و خوش دلی کی عظیم الشان راہ دکھائی۔ 
ہم مسلمان! ہم ہی نے کوفہ، بصرہ، قاہرہ اور بغداد کی تعمیر کی۔ ہم ہی نے شام، عراق، مصر و اندلس کی تہذیب کو جنم دیا۔ ہم ہی ہیں جنہوں نے بیت الحکمۃ، مدرسۂ نظامیہ، قرطبہ یونیورسٹی اور جامعہ ازہر قائم کئے۔ ہم ہی نے مسجد اموی، گنبد صخرہ، سرمن رأی (سامرہ) زہرا، الحمرا اور مسجد سلطان احمد بنائی۔ 
ہم مسلمان! ابوبکر، عمر، نورالدین اور صلاح الدین ہماری ہی قوم کے افراد تھے۔ خالد، طارق، قتیبہ، ابن قاسم اور ملک ظاہر ہمارے تھے۔ بخاری، طبری، ابن تیمیہ، ابن قیم، ابن حزم اور ابن خلدون ہمیں میں سے تھے۔ غزالی، ابن رشد، ابن سینا اور رازی ہمارے ہی دانشور تھے۔ خلیل، جاحظ اور ابوحیان کا تعلق ہمیں سے تھا۔ ابوتمام، متنبی اور معری ہماری ہی اُمت کے ممتاز شاعر تھے۔ معبد، اسحاق و اریاب بھی ہمیں سے وابستہ تھے۔ ہمارا ہر سربراہ و خلیفہ اعلیٰ انسانی کردار کی مثال تھا۔ ہر سپہ سالار اللہ کی تلواروں میں سے ایک برہنہ تلوار تھا۔ ہر عالِم، دنیائے انسانیت کیلئے جسم میں عقل کی مانند تھا۔ ہم ہی میں لاکھوں عظیم و برتر انسان تھے۔ 
ہم مسلمان! ہماری توانائی، ہمارا ایمان تھا۔ ہماری عزت، ہمارا دین تھا۔ ہمارا اصل سہارا، ہمارا پروردگار تھا۔ ہمارا قانون، ہمارا قرآن تھا۔ ہمارے امام، ہمارے رسول عربیؐ تھے۔ ہمارا سربراہ، خدمت گزار تھا۔ ہم ہی سے کمزور حق دار طاقت ور تھا، اور ہمارا زور آور ہمارے کمزور کا مددگار تھا۔ ہم سب باہم راہِ خدا میں بھائی ہیں، اور دین کی نظر میں مساوی۔ 
ہم مسلمان! کیا ہماری ہی اُمت میں اعلیٰ مثالی انسان کی تصویر جلوہ گر نہیں ہوئی؟ کیا چشم ِ تاریخ اور نگاہِ کائنات نے ہمارے معاشرہ کے سوا کسی اور معاشرے کو دیکھا جس نے پاکیزہ اخلاق، سچائی اور ایثار کی مثال پیش کی ہو؟
کیا صدر اسلام کے علاوہ بھی کہیں اور کبھی زندگی کی حقیقت، اصلاح پسندوں کی آرزو اور فلسفیوں کے خواب شرمندہ تعبیر ہوئے؟ کیا یہ واقعہ بھلایا جاسکتا ہے (؟) کہ زخمی مسلمان آخری سانسیں لیتے ہوئے پانی کا ایک گھونٹ چاہتا ہے۔ اس کے ہاتھ میں پانی کا پیالہ دیا جاتا ہے۔ اسی وقت وہ ایک دوسرے زخمی کی آواز سنتا ہے اور اُسے ترجیح دیتے ہوئے پانی اس کی طرف بڑھا دیتا ہے، اور خود پیاسا ہی موت کو گلے لگا لیتا ہے۔ 
وہ بھی ایک دن تھا جب مسلمان عورت کو اس کے شوہر، اس کے بھائی اور اس کے باپ کے شہید ہونے کی خبر دی گئی تو اس کی زبان گویا ہوئی: اللہ کے رسول کیسے ہیں ؟ جواب ملتا ہے کہ وہ زندہ ہیں، تو کہتی ہے: اس خبر کے بعد تو ہر مصیبت کافور ہوگئی!
وہ دن بھی یاد رکھنے کا ہے جب ایک بوڑھی عورت، عمرؓ کو سرکاری حیثیت میں منبر پر ٹوک دیتی ہے، جبکہ عمرؓ اس وقت آج کے ممالک میں سے گیارہ ملکوں کے حکمراں تھے۔ 
وہ دن بھی یادکیجئے جب ہمارا ہر متنفس وہی پسند کرتا تھا جو اپنے بھائی کیلئے چاہتا تھا، اور اسے اپنے آپ پر ترجیح دیتا تھا خواہ اس کے پاس حقیر سی چیز ہو۔ ہمارے جسم و روح مادی و معنوی شکلوں میں پاکیزہ اور ستھرے تھے۔ ہم جو کچھ کرتے یا ترک کرتے، یا اٹھتے بیٹھتے، چلتے پھرتے تو اللہ اور اس کے حکم کو پیشِ نظر رکھتے۔ ہم نے اپنے نفس سے خواہشات کو اس طرح دُور کر دیا تھا کہ ہمارا ہر کام قرآن کے مطابق ہوگیا تھا۔ ہم نوع بشری کے چنیدہ اور انسانیت کے منتخب تھے۔ ہم نے ان تمام آرزوئوں اور تمنائوں کو حقیقت کا روپ دے دیا تھا جنہیں فلسفیوں، دانشوروں اور اصلاح پسندوں نے خواب و سراب قرار دے دیا تھا۔ 

ہم مسلمان!ہمارے فخر وستائش کے لئے سیکڑوں شاہنامے اور الیاذہ نظم کئے جاسکتے ہیں، مگر پھر بھی وہ ہمارے کارناموں کے لئے ناکافی ہوں گے، کیونکہ نہ وہ گنے جا سکتے ہیں نہ شمار۔ ہماری فتوحات اور کامرانیوں کو کون شمار کر سکتا ہے! علم و ادب، فن و ثقافت کی راہ میں ہماری خدمات کا احاطہ کون کرسکتا ہے؟ کیا کوئی ہمارے دانشوروں، صف شکن سالاروں، جوانمردوں، عبقری و نابغہ شخصیتوں کو شمار کر سکے گا؟
صرف وہی ہمت کر سکتا ہے جو آسمان کے ستاروں کو گن چکا ہو، اور بطحا کے میدان کی کنکریوں کو شمار کر چکا ہو! (سیرت کے حواشی پر) ہزاروں کتابیں لکھ لو، (تاریخ کے اوراق پر) اسی قدر تصنیفات کا ڈھیر لگا دو، اور ہر عظیم شخصیت سے متعلق سیکڑوں کتابیں یا قصیدے تیار کر ڈالو، سیرت و تاریخ باقی و تشنہ رہ جائے گی، اسی طرح جیسے کوئی زمین اور محفوظ معدن و کان!
ہم مسلمان! ہمیں صرف زبان جوڑے رکھتی۔ ہم وہ اُمت بھی نہیں ہیں جن میں صرف خون کا رشتہ ہوتا ہے۔ ہر اُمت کے افراد اچھے اور برے ہوتے ہیں، ہم تو ایک عظیم الشان رفاہی انجمن ہیں، جس کے ارکان ہر قوم کے صالح، مہذب، پاکیزہ اور پرہیزگار افراد ہیں۔ اگر خون کا رشتہ ٹوٹ جائے تو ہمیں احتیاط و تقویٰ جوڑے رکھتا ہے۔ اگر زبانیں مختلف ہوئیں تو ہمیں عقیدہ متحد رکھتا ہے۔ ہماری آبادیوں کے فاصلے کو کعبہ شریف کم کر کے قریب کر دیتا ہے۔ یہ بھی کیا کم عظیم سعادت ہے کہ ہر روز کعبہ شریف کی جانب رخ کرنا، ہر سال عرفات میں ہمارا وقوف، اس کا واضح اشارہ ہے کہ اسلام ایک متحدہ قومیت ہے جس کا مرکز حجاز عربی ہے اور اس کے امام و قائد نبی عربیؐ ہیں، اور اس کی کتاب عربی قرآن ہے۔ 
ہم مسلمان! ہمارا دین بھرپور فضیلت و بھلائی اور کھلا ہوا حق و انصاف ہے، نہ کوئی پردہ ہے نہ رکاوٹ، اور نہ کوئی راز ہے نہ بھید۔ یہ مینار کی طرح روشن و بلند ہے۔ کیا اس میں یہ معنی و حقیقت پائی نہیں جاتی؟ کیا دنیا میں کوئی جماعت یا مذہب ہے جس کے اصول روزانہ ۱۰؍ مرتبہ (پانچ ضرب دو) نشر کئے جاتے ہوں جس طرح کہ ہم مسلمانوں کے اصولِ مذہب دہرائے جاتے ہیں، اور موذن بلند آواز سے پکارتے ہیں، ترجمہ: میں گواہی دیتا ہوں کہ اللہ کے سوا کوئی معبود نہیں، اور گواہی دیتا ہوں کہ محمدؐ اللہ کے رسول ہیں۔ 
ہم مسلمان!ہم نہ تو ناتواں ہیں اور نہ غم زدہ، اس لئے کہ اللہ ہمارے ساتھ ہے۔ ہم ہر دن ۳۰؍ بار ایک بابرکت، بلند تر صدا، قلب و روح کو سکون بخشنے والے اور طاقتور ترانے کو سنتے ہیں۔ وہ ترانہ ہے: اللہ اکبر!
بہادری اور اولوا العزمی ہماری فطرت ہے، ایثار و قربانی ہماری رگوں میں رواں دواں ہے۔ گردش زمانہ اسے کمزور نہیں کر سکتی، لیل و نہار کی تبدیلی ہمارے دلوں سے اسے مٹا نہیں سکتی۔ 
ہم کسی بھی ملک میں رہیں وہ ہمارا وطن ہے مگر ہماری نسبت جزیرہ (جزیرئہ عرب) سے ہے جس کی ریت پر ہر طاغوت کا قدم پڑتے ہی جل کر رہ جائے گا، مگر اس کے باشندے اس کی شدت و تپش میں بھی فردوس بریں کا سا مزا محسوس کرتے ہیں۔ ہمارے لئے ملک شام اور اس کے باغ جناں ہیں جنہیں ہم نے خون سے سینچا ہے۔ اس کا بلند و بالا پہاڑ ہمارا محبوب و پسندیدہ ہے۔ عراق ہمارا ہے، (رمیثہ) ہماری آبادی ہے، فرات کی وادیاں ہم سے آباد ہیں۔ فلسطین سے بھی ہمارا رشتہ ہے، مصر جو علم و فن کا گہوارہ اور اسلام کا قلعہ ہے، ہمارا ہے۔ پورا مغرب (شمالی افریقہ) ہمارا ہے، الریف بھی ہمیں سے تعلق رکھتا ہے۔ وہ جانبازوں اور جواں مردوں کی آماہ جگاہ ہے! میناروں اور گنبدوں کا شہر قسطنطنیہ (استنبول) بھی ہمارا ہے۔
ہر وہ زمین ہماری ہے جس میں قرآن پاک کی تلاوت ہوتی ہے اور اس کے مینار اذانوں سے گونج اٹھتے ہیں اس کا معنی یہ کہ آنے والی صبح ہماری، مستقبل ہمارا ہے، اگر ہم اپنے دین کی طرف لوٹ آئیں، اللہ کی رسی کو مضبوطی سے تھام لیں !