۱۸؍ کامیاب امیدواروں میں دہلی کی یسریٰ انیس نے ۷؍واں اورممبئی کی شبینہ یعقوب نے۱۴؍واں رینک حاصل کیا۔

یو پی ایس سی کے ذریعہ منعقدہ انڈین اکنامک سروسیز(آئی ای ایس) کے کامیاب امیدواروں کی فہرست جاری کردی گئی ہے۔ اس کا امتحان پاس کرنے والے امیدوار مرکزی حکومت کے ۵۵؍سے زیادہ محکموں اور وزارتوں میں اہم ذمہ داری ادا کرتے ہیں۔ یہ حکومت ہند کی ایک انتہائی ماہر اور پیشہ ورانہ خدمات ہیں جو اقتصادی تجزیہ، پالیسی کے مجوزہ مشوروں اور سفارشات کو پورا کرتی ہے۔ آئی ای ایس کے امتحان کوہندوستان میں ایک مشکل ترین امتحان مانا جاتا ہے کیونکہ درخواست دہندگان کی تعداد بہت زیادہ ہوتی ہے جو محدود نشستوں کیلئے امیدوارہوتے ہیں۔ اس امتحان میں ہزاروں طلبہ ہر سال شرکت کرتے ہیں۔ 
 گزشتہ سال کے امتحان کا نتیجہ بالآخر جنوری میں ظاہر کیا گیا جس میں ۱۸؍طلبہ کا انتخاب کیا گیا ہے جن میں ۲؍مسلم لڑکیاں بھی شامل ہیں۔

یسریٰ انیس۔ تصویر: آئی این این

یسریٰ انیس( دہلی) نے۷؍ واں اور شبینہ یعقوب( ممبئی) نے ۱۴؍ واں رینک حاصل کیا ہے۔ شبینہ یعقوب نے دسویں جماعت تک کرلا( ممبئی) کی ایم ای ایس اردو میڈیم اسکول سے تعلیم حاصل کی ہے فی الوقت وہ ایس آئی ایس ای کالج آف کامرس اینڈ اکنامکس، سائن (ممبئی) میں بحیثیت لیکچرار خدمات انجام دے رہی ہیں۔