گریٹر نوئیڈا کے ایسٹرپبلک اسکول کی طالبات مانسی سنگھ اور مانیہ سنگھ نے ۹۵ء۸؍فیصد نمبرات حاصل کرکے سبھی کو حیران کردیا ہے

گریٹر نوئیڈا میں رہنے والی  جڑواں  بہنوں  نے بارہویں سی بی ایس سی بورڈ امتحان میںامتیازی نمبرات سے کامیابی حاصل کی ہے۔ خاص بات یہ ہے کہ ان جڑواں بہنوں نے یکساں نمبرات حاصل کرکے سبھی کو حیران کردیا ہے۔ تفصیلات کے مطابق سچیتن راج سنگھ کی جڑواں بیٹیوں نے بارہویں سی بی ایس ای بورڈ  امتحان میں ۹۵ء۸؍فیصد مارکس حاصل کئے ہیں۔  مانسی اور مانیہ نامی یہ بہنیں نہ صرف شکل و شباہت میںایک جیسی ہیں بلکہ تعلیم کے ساتھ دیگرمعاملات میں بھی یکساں مماثلث رکھتی ہیں۔ 
 تفصیلات کے مطابق سینٹرل بورڈ آف سیکنڈری ایجوکیشن (سی بی ایس ای) نے ۱۳؍ جولائی ۲۰۲۰ء کو بارہویں بورڈ کے نتائج ظاہر کئے تھے۔گریٹر نوئیڈا کی ایک سوسائٹی میں رہنے والی مانسی اور مانیہ نامی جڑواں بہنوں نے اس امتحان میںامتیازی کامیابی حاصل کی اور دونوں کا انفرادی نتیجہ ۹۵ء۸؍فیصد رہا۔  ان دونوں نے انگریزی اور کمپیوٹر سائنس میں ۹۸؍۹۸؍نمبرات جبکہ فزکس، کیمسٹری اور فزیکل ایجوکیشن میں  ۹۵؍۹۵؍ مارکس حاصل کئے ہیں۔ اس خبر کے  عام ہوتے ہی ان بہنوں کی کامیابی کے چرچے سوشل میڈیا سے لے کرخبررساں اداروں کی رپورٹوں میں ہونے لگے۔ مانسی سنگھ اور مانیہ سنگھ نے پانچ مضامین میں یکساں نمبرات حاصل کرکے سبھی کو حیران کردیا ہے۔ قبل ازیں  دسویں  بورڈ امتحان میں بھی ان دونوں  بہنوں  کا نتیجہ تقریباً ایک جیسا تھا۔ یہ دونوں جڑواں بہنیں  گریٹر نوئیڈا میں واقع ایسٹر پبلک اسکول کی طالبات ہیں۔  
 معلوم ہوکہ بنیادی طور سے ہاتھرس کے رہنے والے سچیتن راج سنگھ اور جیا سنگھ کے یہاں ۳؍ مارچ ۲۰۰۳ء کو پیدا ہونے والی ان کی یہ جڑواں بیٹیوں کی شکل ہی نہیں  پسندناپسند، رویہ اور پڑھائی تک میں مماثلث ہے۔  مانسی اور مانیہ کو یہ توقع نہیں تھی کہ ان کا رزلٹ ایک دم یکساں ہوگا۔ان جڑواں بہنوں نے بتایا کہ امتحان کیلئے انہوں نے خوب جم کر پڑھائی کی تھی ۔ انہیں اچھے نمبرات سے کامیاب ہونے کی قوی امید تھی لیکن یہ نہیں سوچا تھا کہ رزلٹ بالکل ایک جیسا ہوگا۔ ایجنسی کی رپورٹ کے مطابق یہ دونوں ہی بہنوں کا کریئر کا ہدف بھی ایک ہے ، یہ دونوں  انجینئر بننا چاہتی ہیں۔ انہوں نے جے ای ای مینس کی تیاری بھی شروع کردی ہے ۔