بدلتے زمانے کے ساتھ ہمارے رہن سہن میں کافی تبدیلیاں آگئی ہیں جن کی وجہ سے انسان اکثر پریشان اور بیمار محسوس کرتا ہے۔ بعض دفعہ منفی سوچ بھی ہمیں بیمار کر دیتی ہے۔ اس مضمون میں دس صحتمند عادتوں کے بارے میں بتایا جا رہا ہے جن پر عمل کرکے آپ صحتمند زندگی گزار سکتی ہیں۔

انسان کا رہن سہن اور لائف اسٹائل اس کی صحت کو متاثر کرتا ہے جس کی وجہ سے کچھ لوگ باربار بیمار پڑتے ہیں جبکہ کچھ لوگ ہمیشہ ہشاش بشاش رہتے ہیں۔ کمزور قوت مدافعت بھی بیمار ہونے کی وجہ ہوتی ہے جس کے نتیجے میں آپ کی روزمرہ زندگی بہت زیادہ متاثر ہوتی ہے اور پریشانیاں و فکریں انسان کو گھیر لیتی ہیں۔ یہاں صحتمند انسانوں کی چند عادتیں بتائی جارہی ہیں جنہیں اپنا کر آپ اور آپ کے اہل ِ خانہ صحتمند زندگی گزار سکتے ہیں۔
(۱)مثبت سوچ
 بار بار بیمار رہنے کی ایک وجہ آپ کی سوچ بھی ہوسکتی ہے۔ اگر آپ اپنے دماغ میں یہ بات بٹھا لیں کہ سرد و گرم موسم کے اثرات آپ پر اثر انداز ہورہے ہیں جس کی وجہ سے آپ کا مدافعتی نظام کمزور پڑ رہا ہے تو آپ لازمی بیمار ہوں گے۔ اس کے برعکس آپ اگر موسم کی سختی کو اپنے اوپر حاوی نہ ہونے دیں اور بیماری کے متعلق زیادہ نہ سوچیں تو آپ دیکھیں گے کہ آپ کی صحت پر اس کے مثبت اثرات مرتب ہونا شروع ہوگئے ہیں۔
(۲)مناسب مقدار میں پانی پئیں
 زیادہ سے زیادہ پانی پینےکی عادت کو اپنی زندگی میں اس طرح شامل کرلیں کہ اس کے بغیر آپ کو اپنی زندگی ادھوری محسوس ہونے لگے۔ کوشش کریں کہ دن میں کم از کم ۸؍ گلاس پانی پئیں۔ صحتمند زندگی میں پانی کی اہمیت کا اندازہ اس بات سے بھی لگایا جاسکتا ہے کہ ایک ۲۰؍ کلو وزن کے انسانی جسم کو ایک لیٹر پانی کی ضرورت ہوتی ہے لہٰذا اگر آپ کا وزن ۵۰؍ کلو گرام ہے تو آپ کو ڈھائی لیٹر پانی کی ضرورت ہے۔
(۳)وٹامن سی کا استعمال
 وٹامن سی کا استعمال انسانی صحت کے لئے بہت ضروری ہے کیونکہ یہ وٹامن مدافعتی نظام کو بڑھانے کے ساتھ طاقتور بھی بناتا ہے۔ وٹامن سی حاصل کرنے کا سب سے بہترین ذریعہ ترش پھل جیسے لیموں، کینو، مالٹا وغیرہ ہیں جبکہ دھوپ سے بھی وٹامن سی حاصل کی جاسکتی ہے۔
(۴)بھرپورنیند
 اگر کوئی انسان بے خوابی کا شکار ہے اور جلدی لیٹنے کے باوجود اسے نیند نہیں آتی تو اس کا مطلب ہے کہ اس کا مدافعتی نظام بے حد کمزور ہے کیونکہ نیند کا براہ راست تعلق مدافعتی نظام سے ہوتا ہے لہٰذا کوشش کریں کہ بھرپور نیند لیں اور صبح تازہ دم اٹھیں۔
(۵)صاف صفائی کا خیال رکھیں
 کوشش کریں کہ اپنے آس پاس کی جگہ خاص طور پر فرش، دروازے، لائٹ، سوئچ بٹن، ریموٹ اور ٹوائلٹ وغیرہ کی صفائی کا بےحد خیال رکھیں کیونکہ گھر میں اگر ایک انسان بیمار ہوگا اور وہ ان تمام چیزوں کو ہاتھ لگائے گا تو اس کے جراثیم گھر کے دیگر افراد میں منتقل ہوجائیں گے جس کی وجہ سے دیگر لوگوں کے بیمار ہونے کا خطرہ بڑھ جائے گا۔
(۶)موبائل فون کی صفائی
 موبائل فون استعمال کرنے والے یہ بات ذہن میں بٹھالیں کہ موبائل پر نقصاندہ بیکٹریا سب سے زیادہ تعداد میں پائے جاتے ہیں لہٰذا موبائل فون کی روزانہ صفائی کو یقینی بنائیں اور اگر ہوسکے تو دن میں دوبار اسے اچھی طرح صاف کریں۔
(۷)ہاتھوں کو دھونے کی عادت اپنائیں
 ہاتھ دھونے کی عادت ہمیں بچپن سے سیکھائی جاتی ہے۔ یہ عادت حفظان صحت کے اصولوں کے معیار پر پوری اترتی ہے۔ کھانا کھانے سے پہلے اور بعد میں، اس کے علاوہ ٹوائلٹ سے باہر آنے کے بعد بھی لازمی ہاتھ دھونے کی عادت اپنائیں۔ اس بات کی تلقین بچوں کو بھی کریں۔
(۸)ورزش کرنے کی عادت
 روزانہ ورزش کرنے کو اپنا معمول بنالیں۔ ورزش کرنے سے انسانی صحت پر مثبت نتائج برآمد ہوتے ہیں اور انسان تازہ دم اور چست ہوجاتا ہے۔ اس لئے روزانہ کم سے کم ۳۰؍ منٹ ورزش کریں۔ جم جا کر ورزش کرنا ضروری نہیں ہے۔ آپ گھر میں رہتے ہوئے بھی ورزش کرسکتی ہیں۔ ابتدا میں ہلکی پھلکی ایکسر سائز کریں۔
(۹)غیر معیاری غذا سے اجتناب
 آج کل اسنیکس شوق سے کھائے جاتے ہیں جن میں چپس، پیزا، برگر وغیرہ شامل ہیں۔ تاہم، یہ چیزیں وزن میں اضافے کا باعث بنتی ہیں جبکہ انہیں کھانے سے گلے کے مسائل بھی پیدا ہوجاتے ہیں۔ اس لئے گھر کے بنے کھانے ہی کھائیں۔
(۱۰)خوش رہیں
 کوشش کریں ہر بات پر ڈپریشن اور تناؤ کا شکار نہ ہوں بلکہ بڑی سے بڑی بات کو بھی ہلکے پھلکے انداز میں لیں اور زیادہ سے زیادہ خوش رہنے کی پوری کوشش کریں۔
 اس کے علاوہ ہر مہینے پابندی سے چند لازمی ٹیسٹ کرواتے رہیں تاکہ آپ کو اپنی صحت کے متعلق پوری معلومات ہو۔ ساتھ ہی خود کو ذہنی و جسمانی طور پر فعال رکھنے کی کوشش کریں۔ لوگوں سے ملتے جلتے رہیں۔ اپنے لئے بھی وقت نکالیں۔ اہل ِ خانہ کے ساتھ بھی وقت گزاریں۔ مہینے میں ایک بار تفریح کیلئے بھی جائیں۔