آج کے دور میں خواتین کے لئے گھر بیٹھے کام کرنا پہلے سے کہیں زیادہ آسان ہو چکا ہے اور اس کا سب سے بڑا ذریعہ فری لانسنگ ہے۔ فری لانسنگ خواتین کو موقع فراہم کرتا ہے کہ وہ اپنے ہنر، تعلیم اور صلاحیتوں کو استعمال کرتے ہوئے بااختیار بن سکتی ہیں، ساتھ ہی گھریلو ذمہ داریاں بھی بخوبی نبھا سکتی ہیں۔

دنیا تیزی سے ڈجیٹل ہو رہی ہے اور روایتی کاموں کے طریقے بدل رہے ہیں۔ آج کے دور میں خواتین کے لئے گھر بیٹھے کام کرنا پہلے سے کہیں زیادہ آسان ہو چکا ہے اور اس کا سب سے بڑا ذریعہ فری لانسنگ ہے۔ فری لانسنگ نے خواتین کو ایک نیا موقع دیا ہے کہ وہ اپنے ہنر، تعلیم اور صلاحیتوں کو استعمال کرتے ہوئے نہ صرف یہ کہ مالی طور پر بااختیار بن سکیں بلکہ اپنے گھر، بچوں اور دیگر ذمہ داریوں میں توازن بھی برقرار رکھ سکیں۔
فری لانسنگ کیا ہے؟
 فری لانسنگ کام کرنے کا ایک ایسا طریقہ ہے جس میں آپ کسی ایک مخصوص کمپنی یا آفس سے وابستہ ہونے کے بجائے اپنی مرضی کے مطابق مختلف لوگوں اور اداروں کیلئے آن لائن خدمات فراہم کرسکتے ہیں۔ اس میں مضمون نویسی، ترجمہ، گرافک ڈیزائننگ، ویب ڈویلپمنٹ، ڈجیٹل مارکیٹنگ، ویڈیو ایڈیٹنگ، ورچوئل اسسٹنس اور دیگر کئی شعبے شامل ہیں۔
فری لانسنگ خواتین کیلئے کیوں بہترین ہے؟
 خواتین کے لئے فری لانسنگ ایک بہترین موقع ہے کیونکہ اس میں انہیں گھر بیٹھے کام کرنے کی سہولت مل پاتی ہے۔ انہیں گھر سے باہر جانے کی ضرورت نہیں ہوتی اور وہ اپنی گھریلو ذمہ داریوں کے ساتھ ساتھ آسانی سے کام کرسکتی ہیں۔
 لچکدار اوقات کار
 خواتین اپنی سہولت کے مطابق کام کے اوقات کا تعین کرسکتی ہیں جو بچوں کی دیکھ بھال اور گھریلو امور کے ساتھ بہتر طور پر ایڈجسٹ کیا جاسکتا ہے۔
اضافی آمدنی کا ذریعہ
 فری لانسنگ ان کے لئے اضافی آمدنی کا ذریعہ ثابت ہوسکتی ہے۔ خواتین جو گھریلو زندگی میں مصروف ہیں وہ بھی فری لانسنگ کے ذریعے بااختیار بن سکتی ہیں اور اپنے خاندان کی مالی امداد کرسکتی ہیں۔ اپنی مرضی کا کام کرنے کی سہولت ہوتی ہے۔ خواتین کو وہ کام چننے کی آزادی ہوتی ہے جو ان کی مہارت اور دلچسپی سے مطابقت رکھتا ہو۔
اعتماد اور مہارت میں اضافہ
 جب خواتین اپنے ہنر سے کما رہی ہوتی ہیں تو ان کے اندر خود اعتمادی بڑھتی ہے اور وہ اپنی صلاحیتوں میں مزید نکھار لاسکتی ہیں۔
 اگر آپ فری لانسنگ میں کامیابی حاصل کرنا چاہتی ہیں تو آپ کو کچھ بنیادی مہارتیں حاصل کرنی ہوں گی مثلاً: لکھنے اور ترجمے کی مہارت ٭گرافک ڈیزائننگ ٭ویب ڈویلپمنٹ اور پروگرامنگ ٭ڈجیٹل مارکیٹنگ ٭ویڈیو ایڈیٹنگ اور اینیمیشن ٭ورچوئل اسسٹنس۔
خواتین کیلئے بہترین فری لانسنگ پلیٹ فارمز
 اگر آپ فری لانسنگ کا آغاز کرنا چاہتی ہیں تو درج ذیل آن لائن پلیٹ فارمز بہترین متبادل ہوسکتے ہیں:
 Fiverr
 چھوٹے پروجیکٹس اور سروسیز بیچنے کے لئے ایک بہترین پلیٹ فارم ہے۔
Upwork
 لمبے اور بڑے پروجیکٹس کے لئے بہترین ویب سائٹ ہے۔
Freelancer
 مختلف کاموں کے لئے بہترین آپشن ہے۔
PeoplePerHour
 گرافک ڈیزائننگ اور ڈجیٹل مارکیٹنگ کے لئے مشہور ہے۔
Toptal
 تجربہ کار فری لانسرز کے لئے ایک معیاری پلیٹ فارم ہے۔
فری لانسنگ میں کامیابی کے لئے اہم نکات
 ابتداء میں کم قیمت پر کام کریں تاکہ آپ کا پروفائل مضبوط ہو۔
 اپنی پروفائل کو مکمل اور پروفیشنل بنائیں تاکہ کلائنٹس آپ پر اعتماد کریں۔
 وقت کی پابندی کریں کیونکہ ڈیڈ لائن پر کام مکمل کرنا فری لانسنگ میں بہت اہم ہے۔
 مستقل سیکھنے کا جذبہ رکھیں تاکہ آپ اپنی مہارتوں میں مزید نکھار لاسکیں۔
 کمیونی کیشن کی مہارت کو بہتر رکھیں تاکہ کلائنٹس آپ کے ساتھ بار بار کام کرنا پسند کریں۔
 ورک لائف بیلنس قائم رکھیں۔
 فری لانسنگ خواتین کے لئے خود انحصاری، اعتماد اور کامیابی کے بے شمار مواقع فراہم کرتی ہے۔ اگر آپ بھی کچھ سیکھ کر گھر بیٹھے کمائی کرنا چاہتی ہیں تو آج ہی کسی فری لانسنگ اسکل میں مہارت حاصل کریں اور اپنا کریئر بنائیں۔ اس فن میں مہارت حاصل کرنے کے لئے سب سے پہلے اپنی دلچسپی کے مطابق کوئی ایک مہارت سیکھیں، اپنا فری لانسنگ پروفائل بنائیں اور کام کا آغاز کریں۔ آج کے ڈجیٹل دور میں خواتین کے لئے ترقی کے دروازے کھلے ہیں۔ صرف ہمت اور مستقل مزاجی کی ضرورت ہے۔