آج بنایئے خاص پکوان ’’چٹ پٹی بریانی۔‘‘ اس کی آسان ترکیب ملاحظہ کیجئے۔

درکار اجزاء: بکرے کا گوشت ایک کلو، پیاز ۴؍ عدد، سفید زیرہ ایک بڑا چمچہ، ادرک لہسن پسا ہوا ۳؍ بڑے چمچے، چاول ایک کلو، ٹماٹر ۴؍ سے ۶؍ عدد، دہی ۲؍ پیالی، لونگ ۶؍ سے ۸؍ عدد، نمک حسب ِ ذائقہ، لال مرچ پسی ہوئی ۲؍ بڑے چمچے، تیز پات ایک سے ۲؍ عدد، گھی ایک پیالی، پسا ہوا گرم مسالہ ایک بڑا چمچہ، بڑی الائچی ۲؍ عدد، ہرا دھنیا آدھی گڈی، پودینہ آدھی گڈی۔
بنانے کا طریقہ: گوشت کو دھو کر رکھ لیں، پیاز اور ٹماٹر کو باریک کاٹ لیں۔ سفید زیرہ بھون کر کوٹ کر رکھ لیں، ہرا دھنیا اور پودینے کو باریک کاٹ کر رکھ لیں۔ فرائنگ پین میں گھی ڈال کر ۲؍ سے ۳؍ منٹ گرم کریں، اس میں ایک الائچی، ایک تیز پات اور ۲؍ سے ۳؍ لونگیں ڈال کر کڑکڑا لیں۔ اس میں پیاز کو سنہری فرائی کرکے نکال لیں۔ اس گھی میں ادرک لہسن اور گوشت ڈال کر ڈھانک دیں، درمیانی آنچ پر اتنی دیر پکائیں کہ گوشت ادھ گلا ہوجائے اور اس کا پانی خشک ہوجائے۔ پھر اس میں نمک، لال مرچ، زیرہ، گرم مسالہ، ہرا دھنیا، پودینہ، دہی اور ٹماٹر ڈال کر ملائیں اور ڈھانک کر درمیانی آنچ پر گوشت گلنے تک پکائیں۔ چاولوں کو دھو کر ۱۵؍ سے ۲۰؍ منٹ بھگو کر رکھیں، بڑے سائز کے پین میں ۱۰؍ سے ۱۲؍ پیالی پانی ابالنے کیلئے رکھیں۔ اس میں نمک، تیز پات، بڑی الائچی اور لونگ ڈال کر اُبالیں۔ پھر چاول ڈال کر اتنی دیر ابالیں کہ ایک کنی رہ جائے۔ پھیلی ہوئی چھلنی میں ڈال کر ۴؍ سے ۵؍ منٹ کیلئے چھوڑ دیں۔ دودھ میں کیوڑا اور زردے کا رنگ ملائیں اور اسے تلی ہوئی پیاز کے ساتھ گوشت میں ملا دیں، بڑے پین میں تھوڑے سے چاول پھیلا کر ڈالیں پھر گوشت کی تہہ لگائیں اور آخر میں باقی بچے ہوئے چاول ڈال دیں۔ فرائنگ پین کو اچھی طرح ڈھانک کر ہلکی آنچ پر ۱۰؍ سے ۱۲؍ منٹ دَم پر رکھ دیں۔ ڈش میں نکالنے سے پہلے اچھی طرح ملا لیں۔ عید کے خاص موقع پر ایک زبردست بریانی کا لطف اٹھایئے۔