قیمے کی کچوریاں بنانے کی آسان ترکیب ملاحظہ کیجئے۔

درکار اجزاء: قیمہ (باریک) آدھا کلو، میدہ ایک کلو، گھی حسب ِ ضرورت، نمک حسب ِ ذائقہ، لال مرچ پاؤڈر ایک چھوٹا چمچہ، کالی مرچ پاؤڈر ایک چھوٹا چمچہ، ثابت دھنیا ایک بڑا چمچہ، زیرہ ایک چھوٹا چمچہ، ہری مرچیں چار عدد، ہرا دھنیا ایک گڈھی، پیاز ۲؍ عدد باریک کٹی ہوئی، اجوائن ایک چھوٹا چمچہ، ادرک اور لہسن کا پیسٹ دو بڑے چمچے۔ میٹھا سوڈا ایک چھوٹا چمچہ، لیموں کا رس دو بڑے چمچے۔
بنانے کا طریقہ: میدے میں نمک، دو بڑے چمچے گھی، اجوائن اور میٹھا سوڈا ملا کر ۱۰؍ سے ۱۲؍ منٹ کے لئے اچھی طرح گوندھیں اور پھر ململ کے کپڑے میں لپیٹ کر ۱۵؍ سے ۲۰؍ منٹ کے لئے فریج میں رکھ دیں۔ ایک فرائنگ پین میں ایک بڑا بڑا چمچہ گھی گرم کرکے اس میں قیمہ، ادرک اور لہسن کا پیسٹ، پسی ہوئی لال مرچ، کالی مرچ ڈال کر اتنی دیر پکائیں کہ اس کا اپنا پانی خشک ہوجائے۔ پھر اس میں ثابت دھنیا اور زیرہ شامل کرکے ۲؍ سے ۳؍ منٹ تک بھونیں اور نیچے اتار کر اس میں لیموں کا رس، ہری مرچیں، پیاز، ہرا دھنیا شامل کریں اور ٹھنڈا ہونے کے لئے رکھ دیں۔ اب کچوری بنانے کے لئے آٹے کے پیڑے بنائیں، ہاتھ کو ذرا سا گیلا کرکے اس پر پیڑے کو پھیلائیں اور درمیان میں قیمہ رکھ کر پیڑے کو بند کر دیں۔ اسی طرح تمام کچوریاں بنالیں اور انہیں کچھ دیر کے لئے فریج میں رکھ دیں۔ اس کے بعد کڑاہی میں گھی گرم کریں اور کچوریوں کو ہاتھ سے دبا دبا کر گرم گھی میں ڈالتی جائیں۔ سنہری ہونے پر نکالیں اور کچن پیپر کے اوپر رکھ دیں تاکہ اضافی گھی اس میں جذب ہوجائے۔ افطار پر دہی کی چٹنی کے ہمراہ پیش کریں۔