دیولی اونیارا میں گاؤں والوں کے مطالبات کے تعلق سے نریش مینا اور ایس ڈی ایم میں کہا سنی ہوئی اورامیدوار نے آپا کھودیا۔

راجستھان کے ٹونک ضلع کی دیولی اونیارا سیٹ پر ہونے والے ضمنی انتخاب میں اس وقت متنازع صورتحال پیدا ہوگئی جب یہاں سے الیکشن لڑ رہے آزاد امیدوار نریش مینا ناراض ہو گئے اور مالپورہ کے سب ڈیویژنل مجسٹریٹ( ایس ڈی ایم) امیت چودھری کو تھپڑ مار دیا۔ جس کی وجہ سے وہاں کا ماحول خراب ہوگیا۔ اس واقعہ کے بعد ہنگامہ برپا ہوگیا۔ یہاں گاؤں والوں کے مطالبات کے تعلق سے آزاد امیدوار نریش مینا اور ایس ڈی ایم کے درمیان جھڑپ ہوئی۔ اس کے بعد نریش مینا نے اپنا آپا کھو دیا اور ایس ڈی ایم کو تھپڑ مار دیا۔ 
اطلاعات کے مطابق دیولی اونیارا اسمبلی حلقہ کے کچراوتا گرام پنچایت کے سمراوت گاؤں کے باشندوں نے ووٹنگ کا بائیکاٹ کیا تھا۔ گاؤں والوں کا کہنا تھا کہ ان کا گاؤں پہلے اونیارا سب ڈویژن میں تھا لیکن بعد میں پچھلی حکومت نے ان کے گاؤں کو اونیارا سے نکال کر دیولی سب ڈویژن میں شامل کر دیا تھا۔ وہ اس سے ناخوش ہیں۔ گاؤں کے لوگ کافی عرصے سے مطالبہ کر رہے تھے کہ ان کے گاؤں کو واپس اونیارہ میں شامل کیا جائے۔ 
نریش مینا نے وضاحت میں کیا کہا
تھپڑ مارنے کے واقعہ پر اپنی جانب سے وضاحت دیتے ہوئے نریش مینا نے کہا کہ وہ گزشتہ۴؍ گھنٹے سے اسی معاملے پر احتجاج کر رہے تھے۔ دیہاتیوں کا مطالبہ ہے کہ دیولی جسے سب ڈویژن میں شامل کیا گیا ہے، اسے دوبارہ اونیارا سب ڈویژن میں شامل کیا جائے لیکن ایس ڈی ایم اس کی مخالفت کر رہے ہیں۔ گاؤں والوں کے خلاف جا کر تین لوگوں کا ووٹ ڈلوایا گیا جس کی وجہ سے گاؤں والے ناراض ہو گئےاوریہی ناراضگی اس واقعہ کا سبب بنی۔