سومیا کالج میں فرضی مارک شیٹ کی بنیاد پر لئےگئے داخلےمنسوخ  کئے گئے اور اب محکمہ تعلیم طریق کار میں تبدیلی پر غور کررہا ہے۔

ریاستی بورڈ کے طلبہ کاگیارہویں جماعت میں داخلہ ۱۰؍ویں جماعت کے نمبروں کی بنیاد پر اور مرکزی بورڈ کےطلبہ کاداخلہ ان کے دستاویزات کی بنیاد پر آن لائن کیاجاتا ہے۔ مرکزی بورڈ کے طلبہ بھی دسویں جماعت کے نمبرات اور دیگر دستاویزات آن لائن جمع کرواتے ہیں۔ ۱۱؍ویں میں داخلہ لیتے وقت مرکزی بورڈ کے طلبہ کی مارک شیٹ اور دیگر دستاویزات کی تصدیق ان کے اسکول سے کرائی جاسکتی ہے۔ اس کےباوجود گیارہویں کے آن لائن ایڈمیشن میں امسال ہونےوالی بدنظمی کی وجہ سے محکمۂ تعلیم آن لائن ایڈمیشن کے طریقہ کارمیں تبدیلی کرنے پر غورکررہا ہے۔ دسویں میں فرضی مارکس شیٹ کی بنیاد پر داخلہ حاصل کرنے والے سومیاکالج کے ۴۷؍ طلبہ کاداخلہ منسوخ کردیا گیا ہے۔ اسی وجہ سے داخلہ کی کارروائی میں تبدیلی کرنےکا منصوبہ ہے۔ سمجھا جاتا ہے کہ یہ تجویز سومیا جونیئر کالج گھوٹالے کے بعد پیش کی گئی ہے۔ ریاست کے ۶؍ ڈویژنوں ممبئی، پونے، پمپری چنچوڑ، ناگپور، ناسک، امراوتی میں ۱۱؍ویں کا داخلہ آن لائن کیا جاتا ہے۔ 
  ممبئی میں امسال داخلہ کے عمل میں ایک گھوٹالہ سامنے آیا ہے، جعلی مارک شیٹ کی بنیاد پر غیر قانونی داخلوں کی وجہ سے محکمہ نے اس تعلیمی سال کیلئے سومیا ٹرسٹ کے ۳؍کالجوں کونوٹس جاری کئے ہیں۔ 
 ودیا وہار میں سومیا ٹرسٹ انسٹی ٹیوٹ کے ایس کے سومیا ودیامندر اور جونیئر کالج، کے جےسومیا کالج آف سائنس اینڈ کامرس اور کے جے سومیا کالج آف آرٹس اینڈ کامرس کالج کے ۳؍ کالجوں شامل ہیں ۔ آن لائن داخلہ کے عمل میں ۴۷ ؍ طلبہ کے داخلے غیر قانونی ہونے کا انکشاف ہوا ہے۔ یہ بات سامنے آئی ہے کہ ادارے کے ۳؍جونیئر کالجوں کے کلرکوں نے جعلی مارک شیٹ اور اسکول چھوڑنے کے سرٹیفکیٹ اپ لوڈ کر کے ان طلبہ کو داخلہ دلوایا تھا۔ اس سلسلے میں پولیس اسٹیشن میں شکایت درج کرائی گئی ہے۔ ان طلبہ کا داخلہ منسوخ کر دیاگیاہے۔ اس معاملے کا سنجیدگی سے نوٹس لیتے ہوئے ڈویژنل ڈپٹی ڈائریکٹر آف ایجوکیشن سندیپ سانگوے نے کالج کے خلاف سخت کارروائی کا حکم دیتے ہوئے محکمہ تعلیم کو رپورٹ پیش کی ہے۔ 
  امسال جو داخلہ ا سکینڈل ہوا ہے اس کے بعد یہ آواز اٹھ رہی ہے کہ گیارہویں جماعت کے داخلوں پر بھروسہ کیسے کیا جائے۔ سومیا اسکول گھوٹالے کے بعد محکمہ تعلیم کے ایک سینئر عہدیدار نے بتایا کہ رپورٹ کے مطابق مرکزی طلبہ کے داخلے کے نظام کو تبدیل کرنے کی ضرورت ہے۔