جرمنی میں مقیم بوراک اوزترک اپنے سفر کے پہلے مرحلے میں آسٹریا پہنچیں گے، پھر وہاں سے مختلف ممالک میں داخل ہوتے ہوئے سعودی عرب پہنچیں  گے۔

ترک شہری نے فریضہ حج کی ادائیگی کے لئے جرمنی سے سائیکل کا سفر شروع کر دیا وہ۶؍ہزار کلومیٹر طویل سفر کریں گے۔
   مواصلاتی ترقی نے ماضی کی بہ نسبت حج کے سفر کو آرام دہ اور مختصر بنا دیا ہے  لیکن آج بھی ایسے مہم جو ہیں جو اس فریضہ کی ادائیگی کے لئے سخت مشقت والا سفر کرتے ہیں۔
 ایسے ہی ایک مہم جو ترک شہری۲۶؍ سالہ باراک اوزترک ہیں جنہوں نے۲۰۲۵ء میں فریضہ حج کی ادائیگی کے لئے جرمنی سے سائیکل پر سفر کا آغاز کر دیا ہے۔ وہ۶؍ ہزار کلومیٹر طویل سفر طے کر کےحج کیلئے سعودی عرب پہنچیں گے۔
 سبق نیوز کے مطابق بوراک اوزترک جو اس وقت جرمنی میں مقیم ہیں، اپنے سفر کے پہلے مرحلے میں آسٹریا پہنچیں گے، جہاں سے سلووینیا، کروشیا، سربیا، کوسوو، شمالی مقدونیہ، یونان، ترکی، شام اور اردن سے ہوتے ہوئے سعودی عرب میں داخل ہوں گے۔
 اپنے سفر  سے متعلق ترک نوجوان نے تمام قانونی امور بھی مکمل کر لئے ہیں تاکہ سفر کے دوران آنے والے ممالک سے گزرنے کے دوران کسی قسم کی دشواری کا سامنا نہ کرنا پڑے۔
 مذکورہ نوجوان نے سوشل میڈیا اکاؤنٹ پر مکہ مکرمہ پہنچنے کی حتمی تاریخ  تو نہیں بتائی ہے لیکن ان کا کہنا ہے کہ وہ  فریضہ حج ادا کرنے کے لئے حج کے ایام سے قبل مکہ مکرمہ پہنچ جائیں گے۔
 ان کا کہنا ہے کہ وہ اس روحانی اور بابرکت سفر کا ارادہ پچھلے دو برس سے کر رہے تھے  لیکن خانگی حالات کی وجہ سے اس پر عمل درآمد میں تاخیر کا سامنا کرنا پڑا۔