حادثہ کے سبب پلیٹ فارم نمبرایک پربکنگ کاؤنٹر اوراناؤنسنگ سینٹر کوخالی کرایا گیا ۔کوئی جانی نقصان نہیں

 لوکمانیہ تلک ٹرمنس (تلک نگر) پلیٹ فارم نمبرایک پہلی منزل پر واقع ریلوے کینٹین ’جن آہار‘میںبدھ کی سہ پہر ۳؍ بجے آگ لگنے کی وجہ سے افرا تفری مچ گئی تھی۔ آگ کے شعلے ایسے بلند ہوئے کہ  پلیٹ فارم نمبرایک کو اوراناؤنسنگ سینٹر کوخالی کرالیا گیا۔یہ کینٹین تقریباًڈھائی ہزاراسکوائر فٹ ایریا  پرمحیط ہے۔ آتشزدگی کے تعلق سے بتایا گیاکہ وائرنگ کے سبب آگ شروع ہوئی اورکینٹین کا سامان خاکستر ہوگیا۔اچھی بات یہ رہی کہ اس آتشزدگی میںکوئی جانی نقصان نہیںہوااورکوئی ملازم یا مسافر زخمی بھی نہیں ہوا۔ یہ بھی معلوم ہوا ہے کہ کینٹین میںچمنی بنانے کاکام کیا جارہا تھا۔ 
 سینٹرل ریلوے انتظامیہ کے بیان کے مطابق آگ پرنصف گھنٹے میںقابو پالیا گیا۔ آتشزدگی کی اطلاع ملتے ہی آر پی ایف ،جی آر پی، ٹریفک پولیس اوروارڈ آفیسر کے علاوہ ۶؍فائر انجن ،۵؍ٹینکر، ۴؍ایمبولینس اور دیگر آلات مہیا کرائے گئے اورکافی محنت ومشقت کے بعد آگ پرقابو پالیا گیا جبکہ پوری طرح سے آگ بجھانے میں ڈیڑھ گھنٹے سے زائد وقت لگا ۔اس دوران کچھ ٹرینوںکی آمدورفت پر بھی اثر پڑا ۔
  ریلوے کا انتظامیہ کا یہ بھی کہنا ہےکہ آتشزدگی کی وجوہات کا ہر پہلو سے پتہ لگایا جائے گا اوراسی حساب سے آئندہ کے لئے پیش بندی کی جائے گی کیونکہ یہ اہم ریلوے ٹرمنس ہے، روزانہ یہاں سے بہت سی گاڑیوں میں ہزاروں مسافر ملک کے مختلف حصوں میں بالخصوص یوپی اور بہار روانہ ہوتے ہیں ۔اس لئے حفاظتی انتظامات سے متعلق کوئی سمجھوتہ نہیںکیا جاسکتا اورنہ ہی کوئی خطرہ مول لیا جاسکتا ہے۔