کرلا اسمبلی حلقہ کے متعدد مسائل کا جائزہ لینے کیلئے طلب کی گئی میٹنگ میں وزیر اعلیٰ کی افسران کو ہدایت۔

کرلا ریلوے اسٹیشن کے قریب ٹریفک کے مسائل کو حل کرنے کیلئے تھانے کی طرز پر ’اسٹیشن ایریا ٹریفک  امپرومنٹ اسکیم (سیٹس)‘ (جس کے تحت بسوں کے گزرنے کیلئے ریلوے اسٹیشن کے اوپر  بریج بنایا جاتا ہے)، کو تیزی سے مکمل کرنے کی وزیر اعلیٰ ایکناتھ شندے نے منگل کو بی ایم سی کے افسران کو ہدایت دی۔ یہ ہدایت کرلا اسمبلی حلقہ کے متعدد مسائل کاجائزہ لینے کیلئے منعقد کی جانےوالی میٹنگ میں وزیر اعلیٰ نے دی۔ یہ میٹنگ سہیادری گیسٹ ہاؤس میں منعقد کی گئی تھی۔  وزیر اعلیٰ نے یہ بھی امید ظاہر کی ہے کہ کرلا ریلوے اسٹیشن کے باہر ٹریفک کے مسئلے کو حل کرنے میں سیٹس کار آمد ثابت ہوگا۔
اس میٹنگ میں ممبئی شہر ضلع کے سرپرست وزیر دیپک کیسرکر، ایم ایل اے منگیش کڈالکر، سابق ایم پی راہل شیوالے، وزیر اعلیٰـ کے ایڈیشنل چیف سیکریٹری ڈاکٹر اقبال چہل، وکاس کھرگے، ممبئی میونسپل کارپوریشن کمشنر بھوشن گگرانی اور دیگر افسران و عہدیدار موجود تھے۔
اس موقع پر وزیر اعلیٰ شندے نے کہا کہ کرلا حلقہ میں درختوں کے تحفظ کے لئے دستیاب جگہ میں بوٹینیکل گارڈن بنایا جانا چاہیے۔ انہوں نے ریلوے کے تعاون سے چونا بھٹی میں ریلوے پھاٹک کی جگہ فلائی اوور کی تعمیر کے کام کو تیز کرنے کی بھی ہدایت کی۔اس موقع پر وزیر اعلیٰ نے کرلا اسمبلی حلقہ کے مختلف مسائل کو حل کرنے کیلئے متعلقہ افسران کو ہدایات دیں۔جن میں ریلوے اسٹیشن کےپاس پانی بھر جانا اور ٹریفک جام کا سنگین مسئلہ بھی شامل ہے۔ 
واضح رہے کہ کرلا  میں سی ایس ٹی روڈ پر بدھ کالونی سے کرلا ڈپو کے سگنل تک شدید ٹریفک جام رہتا ہے جس سے شہریوں کو کافی دقتوں کا سامنا کرنا پڑتا ہے۔