گائوں میں ہیں، فون بند کردیا،۵؍ دسمبر کو نئی حکومت کی حلف برداری لیکن اب تک وزارت اعلیٰ کا اعلان نہیں ہوا۔شرساٹ نے کہا کہ’’ کوئی بڑا فیصلہ ہو گا ‘‘

مہاراشٹر میں نتائج آنے کے بعد تقریباً ۱۲؍ دن بعد ریاست میں نئی حکومت کی حلف برداری ۵؍ دسمبر کو ہونے کا اعلان کیا گیا لیکن اب تک نہ نئی حکومت کے خد و خال واضح ہوئے ہیں اور نہ وزارت اعلیٰ کا کا کوئی اعلان ہوا ہے کیوں کہ ایکناتھ شندے ناراض ہو کر اپنے آبائی گائوں ستارا چلے گئے ہیں اور اب وہاں  انہوں نے اپنا فون بھی بند کردیا ہے جس کے بعد ان کی ناراضگی پر چہ میگوئیوں میں اضافہ ہو گیا ہے۔
 بی جے پی اور این سی پی کے ذرائع کا کہنا ہے کہ حکومت کے خدوخال بالکل طے اور واضح ہیں۔ کون سا محکمہ کسے ملنا ہے یہ بھی طے کرلیا گیا ہے لیکن اس کے اعلان سے قبل ہی ایکناتھ شندے ستارا  چلے گئے۔ بتایا جارہا ہے کہ اب وہاں ان کی طبیعت بھی خراب ہو گئی ہے جس کی وجہ سے ممبئی سے کچھ ڈاکٹرس انہیں دیکھنے گئے ہیں۔ بہرحال جیسے ہی وہ واپس آئیں گے حکومت سازی کے تعلق سے تمام تصویر واضح ہو جائے گی۔ بی جے پی ذرائع کا کہنا ہے کہ ایکناتھ شندے اب ضرورت سے زیادہ ڈیمانڈ کررہے ہیں اسی وجہ سے بی جے پی اعلیٰ کمان غور کر رہی ہے مگر ہوگا وہی جو پارٹی کی اعلیٰ کمان چاہے گی۔ واضح رہے کہ ایکناتھ شندے وزارت داخلہ مانگ رہے ہیں۔ اس تعلق سنجے شرشاٹ نے کہا کہ جب بھی ایکناتھ شندے گائوں پہنچے ہیں کوئی بڑا فیصلہ کیا ہے۔ اس بار بھی کوئی بڑا فیصلہ ہی کریں گے ۔ 
 ایکناتھ شندے کے ذرائع کا کہنا ہے کہ چونکہ وہ  وزارت اعلیٰ جیسے منصب کی قربانی  دے رہے ہیں اس لئے وزارت داخلہ مانگ رہے ہیں۔ اس میں کچھ بھی غلط نہیں ہے۔ بی جےپی کو اس پر غور کرنا چاہئے تاکہ سرکار بحسن و خوبی چل سکے۔ اس پورے کھیل میں اجیت پوار کی این سی پی کا بھی کافی اہم رول ہے کیوں کہ اس کی سیٹیں بھی زیادہ آئی ہیں ایسے میں ایکناتھ شندے کے پاس زیادہ دبائو ڈالنےکا موقع نہیں  ہے۔یہ بتایا جارہا ہے کہ اجیت پوار وزارت مالیات اور دیگر وزارتوں پر راضی ہو گئے ہیں۔