اہلیہ سنیتا نے کہا کہ ’’کیجریوال کوجیل کے اندر رکھنے کیلئے ہر ایجنسی کا استعمال ہورہا ہے‘‘
EPAPER
Updated: June 26, 2024, 11:08 PM IST | New Delhi
اہلیہ سنیتا نے کہا کہ ’’کیجریوال کوجیل کے اندر رکھنے کیلئے ہر ایجنسی کا استعمال ہورہا ہے‘‘
دہلی کے وزیر اعلیٰ جو اس وقت ای ڈی کی تحویل میں ہیں انہیں سی بی آئی نے عدالت میں پیشی کے دوران گرفتار کرلیا۔ رپورٹس کے مطابق سی بی آئی نے گزشتہ روز تہاڑ جیل میں اروند کیجریوال سے تقریباً ڈیڑھ گھنٹے تک پوچھ گچھ بھی کی۔ اس کے بعد انہیں بدھ کو عدالت میں پیش کیا گیا جہاں ان کی ۵؍ دن کی تحویل مانگی گئی ۔ اسی دوران انہیں باقاعدہ گرفتار دکھایا گیا۔ دہلی کی خصوصی عدالت نے سماعت مکمل کرنے کے بعد پہلے تو اپنا فیصلہ محفوظ کرلیا تھا اور شام میں فیصلہ سناتے ہوئے کیجریوال کو ۳؍ دن کی سی بی آئی تحویل میں بھیج دیا ۔
اس بارے میںعام آدمی پارٹی کے راجیہ سبھا رکن پارلیمنٹ سنجے سنگھ نے مرکزی حکومت پر اروند کیجریوال کے خلاف بڑی سازش کا الزام لگایا۔ انہوں نے کہا کہ سی بی آئی کی جانب سے اروند کیجریوال کو فرضی کیس میں گرفتار کرنے کی سازش رچی جا رہی ہے۔ سپریم کورٹ میں کیجریوال کی درخواست ضمانت پرسماعت سے ٹھیک پہلے سی بی آئی کے ساتھ مل کر سازش کی ہے تاکہ انہیں ضمانت نہ مل سکے۔
کیجریوال کی اہلیہ سنیتا کیجریوال نے بھی اس پر ردعمل دیا اور کہا کہ کیجریوال کو جیل سے باہر آنے سے روکنے کے لئے یہ تمام سازشیں ہو رہی ہیں لیکن ملک کے عوام سب کچھ دیکھ رہے ہیں۔ اس سے قبل کیجریوال نے بدھ کو سپریم کورٹ میں اپنی درخواست واپس لے لی تھی جس میں وزیراعلیٰ کی ضمانت پر دہلی ہائی کورٹ کے ۲۱؍ جون کے عبوری حکم کو چیلنج کیا گیا تھا ۔جسٹس منوج مشرا اور جسٹس ایس وی این بھٹی کی بنچ نے انہیں درخواست واپس لینے کی اجازت دی تاہم بنچ نے انہیں ضمانت کے حکم پر عمل درآمد کو معطل کرنے کے ہائی کورٹ کےحکم کو چیلنج کرنے والی نئی درخواست دائر کرنے کا اختیار دے دیا ہے۔