مہاراشٹر کے نائب وزیر اعلیٰ اجیت پوار نے یہ اعتراف کیا ہے کہ لوک سبھا انتخابات میں اپنی بیوی کو اپنی بہن کے خلاف الیکشن لڑانا ان کی غلطی تھی۔

مہاراشٹر کے نائب وزیر اعلیٰ اجیت پوار نے یہ اعتراف کیا ہے کہ لوک سبھا انتخابات میں اپنی بیوی کو اپنی بہن کے خلاف الیکشن لڑانا ان کی غلطی تھی۔ انہوں نے کہا کہ ’’مجھے ایسا نہیں کرنا چا ہئے تھا۔ میں اپنی تمام بہنوں سے پیار کرتا ہوں۔ ‘‘ یاد رہے کہ اجیت پوار کی اہلیہ سنیترا پوار نے بارامتی لوک سبھا حلقہ سے سپریا سلے کے خلاف الیکشن لڑا تھا لیکن وہ ہار گئی تھیں۔ 
 مہاراشٹر اسمبلی انتخابات کے پیش نظر اجیت پوار ریاست گیر جن سمان یاترا پر نکلے ہوئے ہیں اور یہیں انہوں نے میڈیا سے گفتگو کرتے ہوئے کہا کہ گھر کے اندر سیاست کی اجازت کبھی نہیں ہونی چاہئے۔ میں نے اپنی بہن کے خلاف سنیترا کو میدان میں اتار کر غلطی کی۔ ایسا نہیں ہونا چا ہئے تھا۔ پارٹی کے پارلیمانی بورڈ نے یہ فیصلہ کیا تھا لیکن اب مجھے لگتا ہے کہ یہ ایک غلط فیصلہ تھا۔ اجیت پوار نے یہ بھی کہا کہ وہ آئندہ اس طرح کی کوئی غلطی نہ کریں اس بات کا بھرپور دھیان رکھیں گے۔ 
 اجیت پوار کے بیان پر اپوزیشن لیڈروں کا ردعمل بھی سامنے آیا ہے۔ شرد پوار کی بیٹی اور اجیت پوار کی چچازاد بہن سپریا سُلے نے کہا کہ وہ فی الحال کچھ کہنا نہیں چاہتیں لیکن جو کچھ بھی اجیت دادا نہیں کہا ہے وہ درست ہی ہو گا۔ کانگریس کی جانب سے کہا کہ الیکشن قریب آتے آتے ایسی بہت سی غلطیوں کا اجیت پوار کو احساس ہو جائے گا اور وہ اپنی یاترا میں اسی طرح سے معافیاں مانگتے رہیں گے۔