میڈیا کے سامنے کہا کہ ’’وقت بدلے گا، انصاف ملے گا اور اعظم خان کے ساتھ انصاف ہوگا۔ ‘‘

ایک طرف لوک سبھا انتخابات کی سرگرمیاں عروج پر ہیں اور دوسری طرف اتر پردیش کے سابق وزیر اعلیٰ اکھلیش یادو نے سیتاپور جیل میں قید اپنی پارٹی کے سینئر اور قد آور لیڈر اعظم خان سے ملاقات کی۔ سماجوادی پارٹی چیف اکھلیش یادو نے ان سے ملاقات کے بعد میڈیا سے گفتگو کرتے ہوئے کہا کہ بی جے پی حکومت اعظم خان کے ساتھ ناانصافی کر رہی ہے، ان کے گھر والوں کو بھی پریشان کیا جا رہا ہے جو کہ پوری طرح غیر قانونی اور غیر اخلاقی ہے۔ اکھلیش یادو نے اعظم خان کو دیر سے ہی سہی لیکن انصاف ملنے کی امید ظاہر کی۔ 

یہ بھی پڑھئے: ای ڈی کیخلاف اپوزیشن الیکشن کمیشن سے رجوع

اکھلیش نے کہا کہ مجھے پوری امید ہے کہ اعظم خان کو انصاف ضرور ملے گا۔ وقت بدلتا ہے، وقت بڑا طاقتور ہوتا ہے۔ اعظم خان کے ساتھ انصاف ہوگا۔ انہوں نے بی جے پی حکومت پر حملہ کرتے ہوئے کہا کہ بی جے پی نے جھوٹے مقدمات کا ریکارڈ بنا دیا ہے، لیکن آخر میں جیت سچائی کی ہوتی ہے۔ اعظم خان سے ملاقات کے بعد اکھلیش یادو نے الیکٹورل بونڈ معاملہ پر بھی ردعمل دیا اور کہا کہ الیکٹورل بونڈ سے بی جے پی کی سچائی باہر آ گئی ہے۔ اب ’پی ڈی اے‘ ہی ’این ڈی اے‘ کو شکست دے گا۔ عوام صرف ووٹ ڈالنے کی تاریخ کا انتظار کر رہے ہیں۔