یہاں مشرق اور مغرب کو جوڑنے والے گوپال کرشن گوکھلے بریج از سر نو تعمیر کے بعد سے مختلف تنازعات کی وجہ سے سرخیوں  میں رہا ہے اور اب راہگیر اس پل پربنائی گئی راہداری پر بارش کا پانی جمع ہونے سے پریشانی کی شکایت کررہے ہیں۔ 

 یہاں مشرق اور مغرب کو جوڑنے والے گوپال کرشن گوکھلے بریج از سر نو تعمیر کے بعد سے مختلف تنازعات کی وجہ سے سرخیوں  میں رہا ہے اور اب راہگیر اس پل پربنائی گئی راہداری پر بارش کا پانی جمع ہونے سے پریشانی کی شکایت کررہے ہیں۔ 
 گوکھلے بریج شروع ہونے کے بعد پہلی ہی بارش میں اس کی راہداری پر بارش کا پانی جمع ہونے لگا ہے جس کی وجہ سے مسافروں کووہاں سے گزرنا محال ہوگیا ہے اور لوگ سوشل میڈیا پر اس کی شکایت بھی کررہے ہیں۔ 
 معروف سماجی رضاکار زورو بھتینا کے ذریعہ بارش کا پانی جمع ہونے کی شکایت پر بی ایم سی کے ’کے ایسٹ‘ وارڈ نے معذرت کرتے ہوئے یقین دہانی کرائی ہے کہ اس تعلق سے بی ایم سی کی متعلقہ ٹیم کا آگاہ کردیا گیا ہے جو جلد ہی اس مسئلہ کا تدارک کرے گی۔ 
 یاد رہے کہ گوکھلے بریج سے متصل سی ڈی برفی والا بریج ہے اور گوکھلے بریج کی از سر نو تعمیر سے قبل ایک دوسرے بریج پر آسانی سے سفر کیا جاسکتا تھا۔ البتہ ۲۰۱۸ء میں گوکھلے بریج کا کچھ حصہ حادثاتی طور پر منہدم ہو گیا تھا۔ اس حادثہ میں جانی اور مالی نقصان ہوا تھا جس کی وجہ سے اس بریج کو منہدم کرکے از سر نو تعمیر کیا گیا ہے لیکن انجینئرنگ کی غلطی کی وجہ سے گوکھلے بریج اور اس سے متصل برفی والا بریج کے درمیان اونچائی کا ۶؍ فٹ کا فرق آگیا ہے جس کی وجہ سے ان پلوں سے گزرنے والی گاڑیاں ایک بریج سے دوسرے بریج پر نہیں جاسکتیں جو از سر نو تعمیر سے قبل ممکن تھا۔ اس خامی کی وجہ سے شہری انتظامیہ پر سخت تنقیدیں کی گئیں جس کے سبب اس خامی کو دور کرنے کے اقدامات کئے جارہے ہیں۔ شہری انتظامیہ نے اس سال کے آخر تک اس مسئلہ کو حل کرنے کی یقین دہانی بھی کرائی ہے۔