مودی سرکار کے چہیتے یوگ گرو نے اپنے شربت کی تشہیر کیلئے مشہور شربت برانڈ اور اس کی کمپنی پر سنگین الزام لگایا ،سوشل میڈیا پر بابارام دیو شدید تنقیدوں کا نشانہ بن گئے

 مودی حکومت کے چہیتے یوگ گرو بابا رام دیو ایک بار پھر اپنے متنازع بیان کے باعث سرخیوں میں ہیں۔ اس بار وہ ’شربت جہاد‘ جیسے متنازع لفظ کے استعمال کے سبب نشانے پر آ گئے ہیں۔ دراصل سوشل میڈیا پر وائرل ہونے والے ایک ویڈیو میں بابا رام دیو نے ایک مشہور شربت ساز کمپنی پر الزام لگایا کہ وہ اپنے منافع سے مساجد اور مدارس تعمیر کر رہی ہے۔ویڈیو میں رام دیو لوگوں کو مشورہ دیتے ہیں کہ وہ بازار میں دستیاب شربتوں کے بجائے پتانجلی کا گلاب شربت خریدیں۔ ان کا کہنا ہے کہ اگر کوئی پتانجلی کا شربت خریدتا ہے تو اس کا پیسہ گروکل‘، پتانجلی یونیورسٹی اور بھارتیہ شکشا بورڈ جیسے اداروں کو جاتا ہے۔مذکورہ ویڈیو پتانجلی کے آفیشل فیس بک پیج پر شیئر بھی کیا گیا ہے۔ اس کے ساتھ ایک اشتعال انگیز کیپشن بھی لکھا گیا، جس میں کہا گیا ہے کہ  ’’شربت جہاد کے نام پر بیچے جا رہے ٹوائلٹ کلینر اور کولڈ ڈرنکس کے زہر سے اپنے خاندان اور بچوں کو بچائیں۔ صرف پتانجلی کا شربت اور جوس ہی  اپنے گھر میں لائیں۔‘‘
 رام دیو نے اس ویڈیو میں سافٹ ڈرنکس کمپنیوں کو بھی نشانہ بنایا اور کہا کہ گرمی میں لوگ جو ٹھنڈے مشروبات پیتے ہیں  وہ دراصل ’ٹوائلٹ کلینر‘ جیسے زہریلے مشروب پی رہے ہیں۔ انہوں نے ان مشروبات کو صحت کیلئے خطرناک قرار دیتے ہوئے کہا کہ یہ دراصل عوام پر حملہ ہے۔اگرچہ رام دیو نے کسی کمپنی کا نام نہیں لیا لیکن ان کے بیان کو ’روح افزا‘ کے بالواسطہ حوالہ کے طور پر دیکھا جا رہا ہے، جو دہائیوں سے ہندوستان کے گھروں میں استعمال ہونے والا ایک معروف شربت ہے۔