جعفر ایکسپریس واقعہ کے ایک ہفتے کے بعد انتظامیہ کافیصلہ ،تعلیمی سرگرمیاں آن لائن جاری رکھنے کی ہدایت۔

جعفر ایکسپریس سانحہ کے بعد انتظامیہ نے بلوچستان یونیورسٹی کو غیر معینہ مدت کیلئے بند کر دیا، اس حوالے سے رجسٹرار بلوچستان یونیورسٹی نے نوٹیفکیشن جاری کردیا۔ ’ڈان‘ نیوز کے مطابق اس حوالے سے جاری کئے گئے اعلامیہ کے مطابق جامعہ بلوچستان سمیت تمام کیمپس کو اپنی تعلیمی سرگرمیاں آن لائن کرنے کی ہدایات جاری کی ہیں ۔جامعہ بلوچستان انتظامیہ کی جانب سے ڈائریکٹوریٹ آف انفارمیشن ٹیکنالوجی کو تمام ڈیٹا آن لائن شفٹ کرنے کی ہدایت دی گئی ہے۔
 نوٹیفکیشن میں یونیورسٹی کے عملے کو معمول کے مطابق اپنے دفاتر میں رپورٹ کرنے کی ہدایت کی گئی ہے۔ گزشتہ ہفتے بلوچستان میں جعفر ایکسپریس پر دہشت گردوں کی جانب سے حملہ کیا گیا اور مسافروں کو یرغمال بنالیا گیا تھا جس کے بعد فورسیز نے ۳۶؍ گھنٹے کے آپریشن کے بعد یرغمال مسافروں کو بازیاب کروالیا تھا اور تمام دہشت گردوں کو ہلاک کر دیا تھا۔