بھیونڈی شہر میں گاڑیوں کی چوری کے بڑھتے ہوئے واقعات کے پیش نظر کرائم برانچ نے کارروائی کرتے ہوئے ۲؍افراد کو گرفتار کر لیا۔ پولیس نے ان کی نشاندہی پر دھولیہ سے ۱۰؍ لاکھ روپے مالیت کے ۱۱؍ مسروقہ رکشے برآمد کئے اور ۶؍ کیس حل کرنےکا دعویٰ کیا۔

بھیونڈی شہر میں گاڑیوں کی چوری کے بڑھتے ہوئے واقعات کے پیش نظر کرائم برانچ نے کارروائی کرتے ہوئے ۲؍افراد کو گرفتار کر لیا۔ پولیس نے ان کی نشاندہی پر دھولیہ سے ۱۰؍ لاکھ روپے مالیت کے ۱۱؍ مسروقہ رکشے برآمد کئے اور ۶؍ کیس حل کرنےکا دعویٰ کیا۔ اس بات کی اطلاع کرائم برانچ کے سینئر پولیس انسپکٹر جناردن سوناونے نے بدھ کو ایک پریس کانفرنس میں دی۔ 
 شانتی نگر پولیس اسٹیشن میں درج رکشا چوری کے مقدمے کی تفتیش کے دوران کرائم برانچ کے اہلکاروں، جن میں پولیس اہلکار وجے کمبھار، امول انگلے اور بھاویش گھرت شامل تھے، نے سینئر انسپکٹر جناردن سوناونے کی رہنمائی میں جائے وقوعہ کے سی سی ٹی وی فوٹیج کا معائنہ کیا۔ فوٹیج میں چوروں کو رکشا چراکر لے جاتے ہوئے دیکھا گیا۔ اس سراغ کی بنیاد پر پولیس کی ایک ٹیم دھولیہ پہنچی جہاں سے مسروقہ رکشے برآمد کئے گئے۔ اس دوران یہ بھی معلوم ہوا کہ رکشا چوری میں ملوث ملزم ارباز شاہ (۲۷) اور سہیل شاہ (۳۰) دونوں رہائشی ترنگا چوک، دھولیہ واردات کے بعد فرار ہو چکے تھے۔ تاہم کرائم برانچ کو خفیہ ذرائع سے اطلاع ملی کہ ارباز شاہ بھیونڈی آنے والا ہے۔ اس پر پولیس انسپکٹر دھنراج کیدار، شری راج مالی، سب انسپکٹر رویندر پاٹل اور اہلکار سنیل سالونکھے، سدیش گھاگ، امول انگلے، بھاویش گھرت، وجے کمبھار کی ٹیم نے کے جی این روڈ، ۶۰؍فٹ روڈ، پائپ لائن روڈ اور شانتی نگر کے علاقوں میں گھات لگا کر ملزم کو گرفتار کر لیا۔ 
 تفتیش کے دوران، ارباز شاہ نے انکشاف کیا کہ بھیونڈی کے بلال نگر کے رہائشی عارف محمد حسین خان (۲۹) مسروقہ رکشے خرید کر فروخت کرتا تھا۔ اس اطلاع پر پولیس نے عارف خان کو بھی اس کے گھر سے گرفتار کر لیا۔ ملزمین کے قبضے سے۱۱؍ رکشے جن کی مالیت تقریباً ۱۰؍لاکھ روپے ہے، برآمد کر لی گئی ہیں۔ دریں اثنا، پولیس کی ٹیم سہیل عرف ساحل شاہ کو گرفتار کرنے کی کوشش کررہی ہے۔