انقلاب ایوارڈ یافتہ کھلاڑی نے کہا کہ میرا خواب ہے کہ میں ملک کے لئے اسی طرح مزید تمغے جیتوں اور پیرالمپکس میں بھی کامیاب رہوں۔

معروف تیر اندازاور انقلاب ایوارڈ یافتہ کھلاڑی عادل محمد نظیر انصاری نے ایک بار پھر شاندار کارکردگی کا مظاہرہ کیا اور ایشیا پیرا کپ ورلڈ رینکنگ ٹورنامنٹ ۲۰۲۵ء میں کانسے کا تمغہ جیت کر ملک کا نام روشن کیا ہے۔ 
حاصل کردہ تفصیلات کے مطابق یہ مقابلہ بینکاک، تھائی لینڈ میں منعقد ہوا، جہاں دنیا بھر کے بہترین ’پیرا آرچرز‘ نے شرکت کی۔عادل انصاری کا یہ کارنامہ نہ صرف بھیونڈی بلکہ پورے ملک کے لئے  فخر کی بات ہے۔ وہ مسلسل عمدہ کارکردگی کا مظاہرہ کرتے ہوئے بین الاقوامی سطح پر اپنی شناخت بنا رہے ہیں۔ روزنامہ انقلاب کی جانب سے جب خصوصی بات چیت کیلئے ان سے بذریعہ فون رابطہ کیا گیا تووہ بینکاک میں ہی موجود تھے، انہوں نے اپنے دلی جذبات کا اظہار کرتے ہوئےکہا کہ’’الحمدللہ !میں  نے ایک مرتبہ پھر بین الاقوامی مقابلے میں اپنے شہر اور ملک کا نام روشن کیا ہے۔میں بے حد خوش ہوں ، یہ تمغہ میرے لئے  بہت خاص ہے، کیونکہ میں نے اس کیلئے انتھک محنت کی ہے۔‘‘ عادل نے مزید کہا کہ میری یہ کامیابی ملک ٹیم ،کوچ اہل خانہ اور دوستوں کی بھرپور حمایت کے بغیر ممکن نہیں تھی۔ میں اپنی ٹیم ، کوچ، اہل خانہ اور ان تمام لوگوں کا شکر گزار ہوں جنہوں نے میرا ساتھ دیا۔‘‘ عادل نے پرعزم لہجے میں کہا کہ’’ میرا خواب ہے کہ میں ملک کے لئے  مزید تمغے جیتوں اور پیرالمپکس میں بھی کامیابی حاصل کروں۔یہ کامیابی ملک  میں پیرا اسپورٹس کی بڑھتی ہوئی ترقی اور کھلاڑیوں کی محنت کا منہ بولتا ثبوت ہے۔‘‘  عادل کی اس کامیابی پر ان کے مداحوں، کوچز اور مقامی افراد نے سوشل میڈیا پر انہیں مبارکباد پیش کی  ہے۔ اہلِ علاقہ خوشی کا اظہار کر رہے ہیں۔