جون ۲۰۲۲ء سے بی ایم سی اور آئی بی بورڈ کے اشتراک سے تجرباتی بنیاد پر اوّل تا دہم جماعت کیلئے یہ اسکول شروع کیاجائیگا

بی ایم سی اسکولوںکے طلبہ کوعالمی درجہ کی تعلیم دینےاور ان کی تعلیمی صلاحیت کے فروغ کیلئے ریاستی حکومت نے سی بی ایس ای اور آئی سی ایس ای اسکولوںکو شروع کرنے کےبعد اب انٹرنیشنل بکالائوریٹ (آئی بی ) اسکول شروع کرنےکافیصلہ کیاہے۔ آئندہ تعلیمی سال ، جون ۲۰۲۲ء سے بی ایم سی اور آئی بی بورڈ کے اشتراک سے تجرباتی بنیاد پر اوّل تا دہم جماعت کیلئے یہ اسکول شروع کامنصوبہ ہے۔ واضح رہےکہ ریاستی وزیربرائے سیاحت و ماحولیات آدتیہ ٹھاکرے کی کوششوں سےممبئی کی بی ایم سی اسکولوںمیں سی بی ایس ای اور آئی سی ایس ای بورڈکے اسکول شروع کئے جانےکےبعد اب بی ایم سی اسکول میں انٹرنیشنل بکالائوریٹ ( آئی بی ) اسکول شروع کرنےکافیصلہ کیاگیاہے۔ اس ضمن میںآدتیہ ٹھاکرے کی قیادت میں بی ایم سی کے اعلیٰ افسران اور آئی بی بورڈ کے عہدیداران کی ایک میٹنگ ہوئی ۔ مذکورہ میٹنگ میں آئی بی بورڈ ایشیاء کی سربراہ اسٹفین لیانگ، مہیش بال کرشنن ، بی ایم سی ایجوکیشن کمیٹی کی صدر سندھیا دوشی، ایڈیشنل میونسپل کمشنر اشونی بھیڈے، ڈپٹی میونسپل کمشنر (ایجوکیشن ) اجیت کمبھار، ایجوکیشن کمیٹی کے رکن سائی ناتھ درگے، ایجوکیشن آفیسر راجیش کنکال اور راجوتڑوی موجود تھے۔واضح رہے کہ بی ایم سی اسکولوںکے بچوں کو مفت اعلیٰ تعلیم دینے کی مہم  کے تحت یہ فیصلہ کیاگیا ہے ۔