تھانے سے ۴۰؍ افرادکشمیر گئے تھے جن میں یہ ۳؍ افراد بھی شامل تھے۔ اہل خانہ صدمے سے نڈھال ۔علاقے میں غم کا ماحول

پہلگام میں منگل کو  دہشت گردانہ حملہ میں ۲۷ ؍ سیاح ہلاک ہو گئے جن میں ڈومبیولی  کے۳ ؍ افراد بھی شامل ہیں۔تھانے ضلع کلکٹر کے جاری کردہ ایک اعلامیہ کے مطابق جس وقت پہلگام میں فائرنگ ہوئی ،اس وقت تھانے ضلع کے کُل ۴۰ ؍ سیاح وہاں موجود تھے جن میں ۳؍ ہلاک ہوگئے  جبکہ دیگر۳۷ ؍ سیاح محفوظ ہیں۔ ایئر انڈیا کے ہوائی جہاز سے ڈومبیولی کے تینوں سیاحوں کا جسد خاکی ممبئی کےایئر پورٹ لایا گیا۔بعدازاں ایمبولنس سے ڈومبیولی لایا گیا اور آخری دیدار کیلئے بھاگیہ شالہ میدان میں رکھا گیا جہاںعوام کا جم غفیر موجود تھا۔ 
 ڈومبیولی سے سیاحت کیلئے کشمیر جانے والے افراد بدقسمتی سے پہلگام میں ہوئے دہشت گرد حملے کا شکار ہوگئے۔ ان میں نوپاڑہ کے سنجے لیلے( ۵۲) ، پانڈورنگ واڑی کے ہیمنت جوشی( ۴۵) اور ناندیولی کےاتل مونے(۴۳)  شامل ہیں جبکہ ہرش لیلے(۲۰) زخمی ہوگئے۔   دہشت گرانہ حملے    میں ڈومبیولی کے  سیاحوں کے مارے جانے کی بدھ کی صبح  خبر جیسے ہی عام ہوئی ، لوگ بڑی تعداد میں اہل خانہ کو تسلی دینے کیلئے ان کی رہائش گاہ پہنچنے لگے۔لوگوں کی بھیڑ کی وجہ سے ٹریفک پولیس نے  مختلف راستوں کو ’ون وے‘ کردیا تھا۔
  بتایا جا رہاہے کہ تینوں فیملی ایک ساتھ کشمیر گھومنے گئی تھی۔ وہاں ان کا قیام مزید ۸ ؍ روز تھا۔ ہیمنت جوشی کے  بیٹے کا بورڈ امتحان ختم ہونے  کےبعد انہوں نے پوری فیملی کے ساتھ کشمیر گھومنے کا پلان بنایا تھا۔بدقسمتی ہیمنت جوشی دہشت گردوں کی گولی لگنے سے ہلاک ہوگئے جبکہ ان کی بیوی مونیکا جوشی اور بیٹا دھرو جوشی محفوظ ہے۔
   تینوں مہلوکین کا جسدخاکی بدھ کی شام ساڑھے۷؍ بجے ایمبولنس سے بھاگیہ شالہ میدان لایا گیا۔ آخری دیدار کے لئے لوگوں کا ہجوم امڈھ پڑا۔یہاں سیکڑوں کی تعداد میں  لوگوں نے ’پاکستان مردہ باد‘ کے نعرے لگائیں۔وزیر اعلیٰ دیویندر فرنویس نے ڈومبیولی پہنچ کر مہلوکین کے اہل خانہ سے تعزیت کی۔