عدالت عظمیٰ نے کہا کہ کسی جرم میںشامل ہونا ملزم کی املاک یا مکان کو منہدم کرنے کا جواز یا اجازت نہیں بن جاتا ، نہ یہ ملک کے قانون میں کہیں موجود ہے

 سپریم کورٹ نے ایک مرتبہ پھر بلڈوزر کارروائی پر شدید ناراضگی کا اظہار کیا ہے۔ کورٹ نے نہایت سخت تبصرے میں کہا کہ بلڈوزر کارروائی کا مطلب یہی ہے کہ ملک کے قانون پر بلڈوزر چلادیا جائے۔یہ نہایت خطرناک روش ہے جو ملک کے مختلف انتظامیہ نے اپنائی ہے اور اس کی حوصلہ افزائی قطعی نہیں کی جانی چاہئے۔ جسٹس جسٹس رشی کیش رائے ، جسٹس سدھانشو دھولیا اور جسٹس ایس وی این بھٹی کی بنچ نے کہا کہ کسی جرم میں شامل ہونا ملزم کی املاک یا مکان کو منہدم کرنے کا جواز یا اجازت نہیں بن جاتا۔ ملک کے قانون میں  ایسا کہیں بھی درج نہیں ہے کہ ملزم کے مکان یا پراپرٹی پر بلڈوزر چلادیا جائے۔ یہ تو ان ممالک میں بھی نہیں ہو تا ہے جہاں لاقانونیت کا دور دورہ ہے جبکہ  ہمارے ملک میں تو قانون کی حکمرانی ہے اور اسے محفوظ رکھنے کیلئے عدالتوں کا باقاعدہ نظام موجود ہے۔
 عدالت  نےیہ سخت تبصرہ گجرات کے کھیڈا نگر پالیکا کے بلڈوزر ایکشن کی دھمکی کے خلاف داخل کی گئی عرضداشت پر سماعت کے دوران کیا۔ عدالت نے مزید کہا کہ اگر ملزم کا جرم ثابت ہو جائے تب بھی  نہ انتظامیہ کو ، نہ پولیس اور اور نہ حکومت کو یہ حق ہے کہ وہ مجرم کی جائیداد پر کوئی کارروائی کرے۔واضح رہے کہ کھیڈا نگر پالیکا نے عرضی گزار جاوید علی محبوب میاں سید کے پشتینی مکان کو بلڈوزر سے منہدم کرنے کا نوٹس دیا تھا کیوں کہ جاوید علی کے بھائی پرجنسی ہراسانی کا مقدمہ درج کیا گیا تھا ۔  انتظامیہ نے جاوید علی کے بھائی کو سزا دینے کے نام پر یہ نوٹس جاری کرتے ہوئے گھر خالی کرنے کی ہدایت دی تھی ۔ اس کے خلاف جاوید علی سپریم کورٹ سے رجوع ہو گئے جہاں کورٹ نے سماعت کرتے ہوئے نہ صرف انتظامیہ کی سخت سرزنش کی بلکہ اس کے اقدامات کو بھی غیر قانو نی اور غیرآئینی قرار دیا۔
 واضح رہےکہ اسی ماہ میں یہ دوسرا موقع  ہے جب سپریم کورٹ نے بلڈوزر کارروائی پر اتنا سخت تبصرہ کیا ہے۔ ۲؍ ستمبر کو بھی سماعت کے دوران کورٹ نے ایسے ہی چشم کشا تبصرے کئے تھے۔ اُس معاملے میں بھی عدالت عظمیٰ میں اگلے ہفتے سماعت طے ہے۔