رپورٹ میں اجتماعی آبروریزی سے انکار کیا گیا ہے اور کلیدی ملزم کے طورپر صرف ایک ہی آدمی کا نام درج ہے۔

سی بی آئی نے آر جی کر کیس میں پہلی چارج شیٹ پیش کی ہے۔ سی بی آئی کے وکیل پیر کی دوپہر چارج شیٹ لے کر سیالدہ عدالت پہنچے۔ ذرائع  کے مطابق چارج شیٹ میں آبروریزی اور قتل کیس کے اہم ملزم کے طور پر صرف ایک  ہی آدمی کا نام درج ہے۔ اس کے علاوہ وہاں ثبوت ضائع کرنے کے الزامات سمیت کئی معاملات کا ذکر کیا گیا ہے۔ پوچھ تاچھ میں ان بیانات کے دستاویزات چارج شیٹ میں پیش کئے گئے ہیں۔
 سی بی آئی نے متاثرہ کی موت کے۵۸؍ دن بعد چارج شیٹ پیش کی ہے۔ آر جی کر میڈیکل کالج و اسپتال میں متاثرہ خاتون ڈاکٹر کی موت کے بعد سے ریاست کے مختلف میڈیکل کالجوں کے جونیئر ڈاکٹر انصاف کے مطالبہ کو لے کر مسلسل احتجاج پر ہیں۔ بھوک ہڑتال کا پروگرام چل رہا ہے۔ جونیئر ڈاکٹروں نے بھی سی بی آئی کے تفتیشی عمل پر برہمی کا اظہار کیا ہے۔دھرم تلہ میں بھوک ہڑتال کرنےوالےجونیئر ڈاکٹروں نے کہا کہ وہ اب سی بی آئی پر بھروسہ نہیں کر سکتے۔ اس دوران مرکزی تفتیشی ایجنسی عصمت دری اور قتل کے معاملات کی جانچ میں پہلی چارج شیٹ لے کر پیر کو عدالت پہنچی۔
 حالانکہ احتجاج کرنے والے جونیئر ڈاکٹر سی بی آئی کی اس چارج شیٹ پر کوئی تبصرہ نہیں کرنا چاہتے ہیں۔ جونیئر ڈاکٹر پیر کی دوپہر دھرم تلہ میںاحتجاجی پلیٹ فارم سے پریس کانفرنس کے دوران کہا کہ ’’میڈیا سے جو معلومات ملی ہیں اس کے مطابق یہ ایک ابتدائی چارج شیٹ ہے۔ اس بنا پر فی الحال ہمارے لئے تبصرہ کرنا ممکن نہیں ہے۔ ہم اپنے  وکیلوں سے بات چیت کریں گے۔ اس کے بعد ہی ہم اس معاملے پر کوئی جواب دیں گے۔‘‘
 اب تک آر جی کر میں خاتون ڈاکٹر کی آبروریزی اور قتل کیلئے مرکزی ملزم ایک ہی شخص ہے۔ سی بی آئی کی جانب سے تحقیقات کی ذمہ داری سنبھالنے سے قبل کلکتہ پولیس نے اسے گرفتار کر لیا تھا۔ بعد میں آر جی کر عصمت دری اور قتل کیس کی تحقیقات کے عمل میں سی بی آئی نے مزید دو لوگوں کو گرفتار کیا ۔ آر جی کر کے اس وقت کے پرنسپل اور تلہ پولیس اسٹیشن کے اس وقت کے او سی کو بھی گرفتار کیا گیا ہے ۔سی بی آئی سیالدہ کی عدالت کو پہلے ہی بتا چکی ہے کہ ان کے خلاف آبروریزی اور قتل کے معاملات میں براہ راست ملوث ہونے کا کوئی الزام نہیں ہے۔ اس واقعے کے بعد انہیں مرکزی تفتیشی ایجنسی نے شواہد کو تباہ کرنے کی کوشش کے الزام میں گرفتار کیا  ہے۔