آر بی آئی کے مطابق تمام بینکوں کیلئے ۳۱؍ مارچ کو ہونے والی اس خصوصی کلیئرنگ میں شرکت کرنا لازمی ہے۔

ریزرو بینک آف انڈیا (آر بی آئی) نے مالی سال ۲۵۔۲۰۲۴ء کے اختتام کے پیش نظر مرکزی اور ریاستی حکومتوں کے لین دین کو آسانی سے طے کرنے کو یقینی بنانے کے مقصد سے ۳۱؍ مارچ کو اسپیشل کلیئرنگ آپریشنزکا فیصلہ کیا ہے۔آر بی آئی نے جمعہ کو تمام بینکوں کو ہدایت دی  ہےکہ یہ اسپیشل کلیئرنگ صرف سرکاری چیک کیلئے  ہوگی اور اسے چیک ٹرنکیشن سسٹم (سی ٹی ایس) کے ذریعے کی جائے گی۔

یہ بھی پڑھئے: رانی مکھرجی کو اپنے خاندان کی معاشی تنگی کے سبب اداکارہ بننا پڑا

عام طور پر کسی بھی کام کاج کے پیر کو جس وقت پر کلیئرنگ ہوتی ہے، وہی وقت۳۱؍ مارچ کو بھی نافذ رہے گا  تاہم اس دن سرکاری لین دین کے فوری تصفیے کیلئے  اسپیشل کلیئرنگ آپریشنز کئے گئے ہیں۔ آر بی آئی نے ہدایت جاری کرتے ہوئے کہا کہ تمام بینکوں کیلئے ۳۱؍ مارچ کو ہونے والی اس خصوصی کلیئرنگ میں شرکت کرنا لازمی ہے۔ مزید برآں، بینکوں کو ہدایت دی گئی ہے کہ وہ اپنے کلیئرنگ انفراسٹرکچر کو خصوصی کلیئرنگ اوقات کے دوران کھلا رکھیں اور کلیئرنگ سے متعلق تمام سیٹلمنٹ آپریشنز کو مکمل کرنے کیلئے اپنے کھاتوں میں خاطرخواہ رقم رکھیں۔
تمام بینکوں کیلئے نیشنل گرڈ کلیئرنگ ہاؤس کے چیئرمین اور نیشنل پیمنٹ کارپوریشن آف انڈیا (این پی سی آئی) کی طرف سے جاری کردہ ہدایات پر عمل کرنا لازمی ہوگا۔ این پی سی آئی نے اس سلسلے میں ۳؍ اکتوبر۲۰۱۶ء کو ایک سرکیولر بھی جاری کیا تھا، جس میں اس بات کی وضاحت کی گئی تھی کہ خصوصی کلیئرنگ سیشن کے دوران کس قسم کے دستاویزات جمع کئے جائیں گے۔