مہاراشٹر کانگریس کے صدر نانا پٹولے اور کانگریس کے سابق اپوزیشن لیڈر وجے وڈیٹیوار نے جمعرات کو مطالبہ کیا ہے کہ منترالیہ میں داخلے کیلئے متعارف کرائے گئے ’فیس ریکگنیشن سسٹم (چہرے کی شناخت کا نظام)‘ کو ختم کیا جائے۔

مہاراشٹر کانگریس کے صدر نانا پٹولے اور کانگریس کے سابق اپوزیشن لیڈر وجے وڈیٹیوار نے جمعرات کو مطالبہ کیا ہے کہ منترالیہ میں داخلے کیلئے متعارف کرائے گئے ’فیس ریکگنیشن سسٹم (چہرے کی شناخت کا نظام)‘ کو ختم کیا جائے۔ انہوں نے الزام عائد کیا ہے کہ یہ نظام عام شہریوں کو منترالیہ میں داخلہ نہ دینے کے مقصد سے شروع کیا گیا ہے لیکن اس کی وجہ سے منترالیہ کے افسران اور ملازمین کو بھی کافی دقت پیش آرہی ہےکیونکہ اس کی وجہ سے داخلہ ملنے میں کافی تاخیر ہوتی ہے اور وقت ضائع ہونے سے کام کاج  بھی متاثرہورہا ہے۔
 نانا پٹولے نے کہا ہے کہ گزشتہ چند روز سے منترالیہ میں داخلے کیلئے لمبی لمبی قطاریں لگ رہی ہیں اور اس میں اضافہ ہوتا جارہا ہے اور افسران، ملازمین اور عام شہریوں کا منترالیہ میں داخل ہونے کیلئے بہت زیادہ وقت ضائع ہورہا ہے۔ایسا محسوس ہورہا ہے جیسے حکومت جان بوجھ کر عام شہریوں کو منترالیہ سے دور رکھناچاہتی ہے۔‘‘ انہوں نے یہ بھی الزام عائد کیا کہ ’’بڑے بڑے صنعتکاروں اور بلڈروں کو منترالیہ میں بنا روک ٹوک داخلہ مل جاتا ہے۔‘‘