دہلی الیکشن میں یوپی اور بہار کے ووٹرس کو رِجھانے کیلئے پارٹی نے حکمت عملی بنائی۔

کانگریس نے  دہلی میں اقتدار میں آنے پر  پوروانچل کے لوگوں کی  فلاح و بہبود کے لئے ایک الگ وزارت بنانے اور بجٹ کا انتظام کرنے کا وعدہ کیا ہے۔ سابق مرکزی وزیر اور کانگریس کے سینئر لیڈر اکھلیش پرساد سنگھ نے دہلی پردیش کانگریس  کے ہیڈکوارٹر میں اس کا اعلان  کیا۔ اس موقع پر آل انڈیا کانگریس کمیٹی کی سوشل میڈیا ہیڈ سپریہ شرینیت، کنہیا کمار پرنو جھا اور ابھے دوبے موجود تھے۔ سنگھ نے کہا کہ دہلی میں پوروانچل کے لوگوں کی حالت انتہائی قابل رحم ہے۔ دہلی میںپوروانچل کے لوگ بدتر حالات میں جی رہے ہیں اسی لئے پارٹی نے ان کے لئے تیز رفتاری سے کام کرنے کیلئے علاحدہ وزارت بنانے کا فیصلہ کیا ہے۔
 پارٹی لیڈروں کے مطابق عام آدمی پارٹی اوربی جے پی  پوروانچل کے لوگوں کو ووٹ بینک کی خاطر استعمال کرتی ہیں لیکن ان کی بہتری کے لئے کوئی کام نہیں کرتی ہے۔انہوں نے کہا کہ اگر  کانگریس دہلی میں اقتدار میں آتی ہے تو پوروانچل کے لوگوں کے لئے ایک الگ وزارت بنائی جائے گی۔ اس کے لیے بجٹ کا تعین بھی کیا جائے گا۔