ریاست میں بڑھتی بے روزگاری کے خلاف کانگریس نے سڑکوں پر اتر کر احتجاج شروع کیا، پارٹی کے کئی لیڈر اور کارکنوں کوپولیس نے تحویل میں لیا۔

کانگریس پارٹی نے بہار میں روزگار کی دگرگوں حالت ، بڑھتی بے روزگاری  اور ریاست سے  روزگار کے متلاشی نوجوانوں کی ہجرت روکنے کے لئے ’ہجرت روکو ، ملازمت دو‘ یاترا شروع کی ہے۔ پارٹی نے سڑکوں پر اتر کر یہ مہم چلانے کا فیصلہ کیا ہے۔ اس کے تحت پارٹی کے  نوجوان لیڈر کنہیا کمار نے پٹنہ  میں احتجاج کیا لیکن وہاں انہیں حراست میں لے لیا گیا۔ شہر کے صداقت آشرم سے نکلنے کے بعد اپنی یاترا کے دوران کنہیا کمار  وزیر اعلیٰ نتیش کمار کی رہائش گاہ  تک جانے والے تھے، لیکن اس سے قبل ہی پولیس نے ان کو روک  لیااور حراست میں لے لیا۔
بہار کی راجدھانی پٹنہ میں  اس واقعے کی وجہ سے دن بھر سیاسی ہلچل کافی بڑھی ہوئی تھی۔ یاد رہے کہ کانگریس پارٹی کی ’ہجرت روکو، ملازمت دو‘ یاترا، جس کی قیادت کنہیا کمار کر رہے ہیں گزشتہ کئی دنوں سے جاری ہے۔ اس یاترا کا  جمعہ کو  پٹنہ میں وزیر اعلیٰ نتیش کمار کی رہائش گاہ پر اختتام  ہونے والا تھا لیکن پولیس نے اسے ناکام بنانے کی ہرممکن کوشش کی ۔  
میڈیا رپورٹس کے مطابق کنہیا کمار صداقت آشرم سے ’ہجرت روکو، ملازمت دو‘ یاترا میں نکلے، لیکن ان کے وہاں سے نکلتے ہی پولیس نے ان کو راجہ پل کے پاس ہی روک دیا۔ یاترا میں شامل لوگوں پر واٹر کینن بھی چلایا گیا اور لاٹھی چارج کی خبریں بھی سامنے آ رہی ہیں۔ یاترا شروع کرنے سے پہلے کنہیا کمار نے کہا کہ بہار کے عوام بے روزگاری اور غریبی سے بے حال ہیں۔ مجبوری میں  انہیں ہجرت کرنی  پڑ رہی ہے۔ اسے روکنےمیں نتیش حکومت ناکام ہے۔ واضح رہے کہ یہ یاترا ۱۶؍ مارچ کو  مغربی چمپارن  سے شروع ہوئی تھی۔