ببو خان پیش پیش رہے، اقلیتی فرقہ سے حمایت کی خصوصی اپیل بھی کی۔

دھاراوی اسمبلی حلقے  سے کانگریس کی امیدوار جیوتی گائیکواڑ کی انتخابی مہم  کا اختتام پیر کو روڈ شو کے ساتھ ہوا۔ ۹۰؍ فٹ روڈ پر نکالے گئے روڈشو میں کانگریس کے اہم لیڈر ببو خان پیش پیش رہے جنہوں نےعام ووٹرس اور بطور خاص مسلمانوں سے اپیل کی وہ  دھاراوی کو بچانے  اور فرقہ پرست طاقتوں کو اقتدار سے بے دخل کرنے کیلئے ذمہ داری کے ساتھ ووٹنگ کرتے ہوئے جیوتی گائیکواڑ کے حق میں اپنے حق رائے دہی کا استعمال کریں۔ 
انتخابی مہم کے خاتمے کے بعد جیوتی گائیکواڑ نے دھاراوی کے عوام کی جانب سے ملنے والی حمایت اور محبتوں کا شکریہ ادا کرتے ہوئے اس عزم کا اظہار کیا کہ وہ اپنی اس بستی اور یہاں کے لوگوں کیلئے ہر حال میں کھڑی رہیں گی۔  انہوں  نے اپنی انتخابی مہم کو ’’دھاراوی کو بچانے کی لڑائی‘‘ سے تعبیر کیا ہے اور ’’ناانصافی کے خلاف جدوجہد‘‘ کا نعرہ دیا ہے۔  واضح رہے کہ ایسے وقت میں جبکہ مہایوتی حکومت نے دھاراوی کا پروجیکٹ اڈانی کو دے دیاہے، دھاراوی کے مقامی افراد  زبردست اندیشوں میں مبتلا ہیں۔ انہیں اس بات کا خوف ہے کہ اگر مہایوتی  دوبارہ اقتدار میں  آگئی تو پھراڈانی سے اس کے لیڈروں کی قربت کی وجہ سے دھاراوی کو بچانا مشکل ہوگا اور انہیں بے گھر ہونا پڑ سکتاہے۔ 
 انتخابی مہم کے خاتمے  کےبعد دھاراوی سے کانگریس کی امیدوار جیوتی گائیکواڑ نے ایک فیس بک پوسٹ میںلکھا ہے کہ ’’میرے لئے یہ کسی اعزاز سے کم نہیں ہوگا کہ دھاراوی کے عوام مجھے اپنی خدمت کیلئے منتخب کریں۔ میں ایوان میں  آپ کی آواز بنوں گی  اور دھاراوی کو بچانے کی لڑائی ایوان اقتدار تک لے جاؤں گی۔‘‘