ایئر انڈیا کی یہ ملازمتیں کسی بڑے عہدے یا بہت بڑے پیکیج کیلئے نہیں تھیں بلکہ ایئر پورٹ لوڈر کی تھیں ، بھیڑ کا ویڈیو شیئر کرکے کانگریس کی مودی سرکار تنقید

ملک میں بیروزگاری کس قدر خطرناک صورت اختیار کر چکی ہے، اس کا اندازہ ممبئی  میں ایئر انڈیا کی ملازمتوں کیلئے پہنچنے والی بھیڑ سے لگایا جاسکتا ہے جہاں  محض ۲۲؍ سو ملازمتوں کے لئے تقریباً ۲۵؍ہزار نوجوان پہنچ گئے اور ایئر انڈیا کے ملازمین کو بیروزگاروں کی اس بھیڑ کو سنبھالنا مشکل ہوگیا۔ایئر انڈیا کی جانب سے نکلنے والی یہ ملازمتیں کسی بڑے عہدے یا کسی بہت بڑے پیکیج کیلئے نہیں تھیں بلکہ یہ ’ایئرپورٹ لوڈر‘ کی تھیں جس میں تنخواہ ۲۰؍ سے ۲۵؍ ہزار روپے ماہانہ ہی ہوتی ہے لیکن ا وور ٹائم الاؤنس کے بعد ملازمین ۳۰؍ ہزار روپے تک کما لیتے ہیں۔ ایئرپورٹ لوڈر کو ہوائی جہاز کی لوڈنگ اور اَن لوڈنگ اور سامان کے بیلٹ اور ریمپ ٹریکٹر چلانے کا کام سونپا جاتا ہے۔ سامان، کارگو اور کھانے پینے کی اشیاء کو سنبھالنےکیلئے ہر ہوائی جہاز کو کم از کم پانچ لوڈرز کی ضرورت ہوتی ہے۔
 ایئر انڈیا کی ان ملازمتوں کے  لئے شہر کے کالینا  علاقے میں جہاں انٹرویوز ہورہے تھے ۲۴؍ ہزار سے زائد لوگ جمع ہو گئے۔ بھیڑ اس قدر بڑھ گئی کہ ایئر انڈیا انتظامیہ کیلئے انہیں سنبھالنا مشکل ہو گیا ۔ اس کے  لئے پولیس بھی طلب کی گئی تھی مگر یہ بھیڑپولیس کے لئے بھی درد سر بن گئی۔ اس تعلق سے وائرل ہونے والے ویڈیوز میںدیکھا جاسکتا ہے کہ فارم کاؤنٹر تک پہنچنے کیلئے نوجوان  ایک دوسرے پر ٹوٹے پڑ رہے ہیں۔
  نوکری پانے کے متمنی نوجوانوں کی بھیڑ کا ویڈیو کانگریس نے اپنے سوشل میڈیا پلیٹ فارم پر شیئرکرتے ہوئے طنز کیا ہے کہ ’’یہ ویڈیو ملک میں بیروزگاری کی حالت بیان کر رہا ہے۔ آج ممبئی میں ملازمت کے  لئے ہزاروں نوجوانوں کی بھیڑ پہنچ گئی ۔ ایسا ہی نظارہ کچھ دن قبل گجرات میں بھی دیکھنے کو ملا تھا لیکن نریندر مودی کھلے عام جھوٹ بول رہے ہیں کہ انہوں نے کروڑوں ملازمتیں دی ہیں۔‘‘