آج فیس بک لائیو کے دوران یو بی ٹی کے سابق ایم ایل اے کے بیٹے اور سابق کارپوریٹر ابھیشیک گھوساڑکر کو مورس نورونہا نے کسی ذاتی تنازع کے سبب گولی مار دی۔ انہیں فوری طور پر اسپتال لے جایا گیا۔ تاہم، دورانِ علاج ان کی موت واقع ہوگئی۔ دوسری جانب، مورس نورونہا نے بھی اپنے آپ کو گولی مارکر خودکشی کرلی۔ ممبئی پولیس معاملے کی تفتیش کررہی ہے۔

دہیسر (ممبئی) میں جمعرات کو کسی تنازع کے بعد ادھو بالا صاحب ٹھاکرے شیوسینا (یو بی ٹی) کے سابق ایم ایل اے ونود گھوساڑکر کے بیٹے ابھیشیک گھوساڑکر کو بدنام زمانہ مورس نورونہا نے گولی ماردی جس کے نتیجے میں ان کی موت واقع ہو گئی۔ خبروں کے مطابق فائرنگ کے وقت گھوساڑکر علاقے میں مقامی لوگوں سے ملاقات کررہے تھے۔ انہیں دو سے تین گولی لگی جس کے بعد انہیں دہیسر کے کرونا اسپتال میں داخل کیا گیا جہاں دورانِ علاج ان کی موت واقع ہو گئی۔

#WATCH | Shiv Sena (UBT) leader Abhishek Ghosalkar shot in a firing in Dahisar area of Mumbai. He has been admitted to a hospital. Police present at the spot.

Details awaited. https://t.co/nYNsANQfHl pic.twitter.com/qZkoX4gLlr

— ANI (@ANI) February 8, 2024

اطلاعات کے مطابق حملہ مورس نورونہا (مورس بھائی کے نام سے مشہور ) کے دفتر میں ہوا جن سے ابھیشیک کی ذاتی دشمنی تھی۔ تاہم، دونوں نے حال ہی میں معاہدہ کیا اور ابھیشیک کو مبینہ طور پر ایک تقریب کیلئے مورس نورونہا کے دفتر میں مدعو کیا گیا تھا۔ اے این آئی کی رپورٹ کے مطابق، مورس بھائی نے مبینہ طور پر خود کو گولی مارنے سے پہلے ابھیشیک کو گولی مار دی اور یہ پورا منظر فیس بک پر لائیو اسٹریم ہوا۔

یہ واقعہ ایسے وقت میں ہوا جب کچھ دنوں قبل ہی بی جے پی ایم ایل اے نے ایکناتھ شندے گروپ کے لیڈر کو الہاس نگر پولیس چوکی کے اندر کیمرے کے سامنے ہی گولی مار دی تھی۔ اس قسم کے واقعات مہاراشٹر میں نظم و نسق کی صورتحال پر سوال کھڑاکر رہے ہیں۔ 
اس واردات کے بعد مختلف لیڈروں نے بیانات جاری کرکے مہاراشٹر حکومت پر شدید تنقید کی ہے۔ یو بی ٹی کے ترجمان آنند دوبے نے کہا کہ بی جے پی کے ذریعے مہا راشٹر میں انارکی پیدا کی جا رہی ہے۔ ایکناتھ شندے کی شیو سینا اور اجیت پوار کی این سی پی مکمل طو ر پر ناکام ہو گئی ہے۔ ہر کوئی اپنے آپ کو غیر محفوظ محسوس کر رہا ہے۔ جب عوامی نمائندے ہی محفوظ نہیں تو عام شہریوں کے بارے میں کیا کہہ سکتے ہیں۔ سنجے رائوت نے کہا کہ حکومت جرائم پیشہ عناصر کی پر ورش کر رہی ہے۔ اس کا زندہ ثبوت آج ممبئی میں نظر آیا۔ اس کیلئے کون جوابدہ ہے؟