بدنام زمانہ گینگسٹر کپل سانگوان کے درمیان بات چیت کا آڈیو کلپ منظر عام پر آنے کے بعد عام آدمی پارٹی کے ایم ایل اے نریش بالیان کو گرفتار کر لیا گیا ہے۔ اروند کیجریوال نے ایک پریس کانفرنس کی جس میں انہوں نے مرکزی حکومت کو تنقید کا نشانہ بنایا۔

عام آدمی پارٹی کے سربراہ اور دہلی کے سابق وزیر اعلیٰ اروند کیجریوال نے رکن اسمبلی نریش بالیان کی گرفتاری پر برہمی کا اظہار کیا۔ انہوں نے اتوار کو ایک پریس کانفرنس میں دہلی پولیس اور مرکزی وزیر داخلہ امیت شاہ پر شدید الزامات عائد کئے۔ کیجریوال کا کہنا تھا کہ بالیان کو گینگسٹر کپِل سانگوان کی دھمکیوں کا سامنا تھا لیکن پولیس نے ان کی شکایات کو نظرانداز کرتے ہوئے خود انہیں ہی گرفتار کر لیا۔ کیجریوال نے کہا کہ نریش بالیان کو گزشتہ ڈیڑھ سال سے نندو گینگ سے جان سے مارنے کی دھمکیاں دی جا رہی تھیں۔ گینگ نے بالیان کے بیٹے اور خاندان کے دیگر افراد کی تفصیلات بھی عوامی طور پر افشا کر دی تھیں۔ ان کا مزید کہنا تھا کہ گینگسٹرز چاہتے تھے کہ بالیان ان کے کہنے پر لوگوں سے زبردستی رقم وصول کریں، ورنہ انہیں قتل کر دیا جائے گا۔ 

یہ بھی پڑھئے: اجمیر درگاہ کے بعد اب ’ڈھائی دن کا جھونپڑا‘ پر تنازع

کیجریوال نے پولیس پر الزام عائد کرتے ہوئے کہا کہ بجائے اس کے کہ گینگسٹرز کے خلاف کارروائی کی جاتی، دہلی پولیس نے رکن اسمبلی کو ہی گرفتار کر لیا۔ انہوں نے کہا، ’’یہ ظاہر کرتا ہے کہ دہلی کی قانون و انتظام کی حالت کتنی خراب ہو چکی ہے، جہاں شکایت کرنے والے خود نشانے پر ہیں۔ ‘‘کیجریوال نے امت شاہ پر براہ راست تنقید کرتے ہوئے کہا کہ انہوں نے دہلی میں گینگسٹرز کو کھلی چھوٹ دے رکھی ہے اور شکایت کنندگان کو سزا دی جا رہی ہے۔ انہوں نے دعویٰ کیا کہ دہلی میں خوف کا ماحول پیدا ہو چکا ہے، جہاں دن دہاڑے گینگسٹرز فائرنگ کرتے ہیں اور کاروباری افراد بھتہ نہ دینے پر قتل کئے جا رہے ہیں۔ انہوں نے دہلی کے پوش علاقے پنچ شیل انکلیو کا حوالہ دیتے ہوئے کہا کہ ایک ۶۴؍سالہ شخص کو بے دردی سے قتل کر دیا گیا۔ انہوں نے دہلی میں خواتین اور سینئر شہریوں کے عدم تحفظ پر بھی تشویش ظاہر کی۔ کیجریوال نے دعویٰ کیا کہ وہ مسلسل ان مسائل کو اٹھا رہے ہیں لیکن ان پر اور ان کے ارکان اسمبلی پر حملے ہو رہے ہیں۔ پریس کانفرنس کے دوران کیجریوال نے کہا، ’’یہ وقت دہلی کے شہریوں کو انصاف دلانے کا ہے۔ ہم ان گینگسٹرز کے خلاف آواز بلند کرتے رہیں گے، چاہے ہمیں کتنی ہی رکاوٹوں کا سامنا کیوں نہ کرنا پڑے۔ ‘‘