متوفیوں میں۲؍ معصوم بچے شامل، دوسرے حادثے میں ایک ۱۲؍ سالہ لڑکے کی سیلاب میں بہنے سے موت۔

راجستھان کی راجدھانی جئے پور میں دہلی کوچنگ سینٹر جیسا دردناک واقعہ پیش آیا ہے۔حادثے میں۳؍ بچوں کی موت ہوگئی جو بیسمنٹ میں سورہے تھےاورشدید بارش کےسبب وہاں پانی بھرگیا ۔جبکہ ایک ۱۲؍ سالہ بچےکی سیلاب میں بہنے سے موت ہوگئی۔ کچھ  ذرائع  مذکورہ تین بچوںکوجن کی موت کی خبر سامنے آئی ہے ،لاپتہ بتا رہے ہیں لیکن دیگر  ذرائع نے ان کی موت کی تصدیق کی ہے۔یہ واقعہ جے پور کے وشوکرما علاقے کا بتایاجارہا ہے۔
سبھی کی لاشیں بیسمنٹ سے نکال لی گئی ہیں۔میڈیا رپورٹس کے مطابق جے پور کے سیکر روڈ نمبر۱۷؍ پر بیسمنٹ میں جمعرات کی علی الصباح پانی بھر گیا تھا۔ یہ بیسمنٹ تقریباً ۱۵؍ فٹ گہرا تھا جہاں ایک شخص اپنی فیملی کے ساتھ سو رہا تھا۔حا دثہ کی خبر ملتے ہی موقع پر سول ڈیفنس اور ایس ڈی آر ایف کی ٹیم پہنچی اور ڈوبنے والوں کی لاش باہر نکالنے کا عمل شروع کیا۔
 تفصیلات کے مطابق اشوک کمار سینی نامی شخص کے گھر  کے بیسمنٹ میں ان کا بیٹا-بیٹی اور رشتہ دار کی پوتی کے ساتھ ساتھ کچھ دیگر رشتہ دار بھی سو رہے تھے۔ بدھ کے روز جے پور میں زوردار بارش ہوئی جس کے بعد کئی علاقوں میں پانی بھر گیا گیا۔اس بیسمنٹ میں بھی بدھ کی دیر شب دھیرے  دھیرے پانی بھرنا شروع ہوا جس کی خبر سوتے ہوئے لوگوں کو نہیں ہو سکی۔ جب لوگوں کی آنکھ کھلی تو ایک ہنگامہ برپا ہو گیا۔ کچھ لوگ بڑی مشکل سے باہر نکلنے میں کامیاب ہوئے لیکن ۳؍ لوگوں کی موت واقع ہو گئی۔ قابل ذکر ہے کہ جے پور میں اب بھی موسم خراب ہے اور آئندہ۷۲؍ گھنٹوں تک بارش کا الرٹ دیا گیا ہے ۔ کئی علاقوں میں سڑکوں کے دھنسنے اور اسپتالوں وغیرہ میں پانی بھرنے کی خبریں سامنے آرہی ہیں۔ ایک چھوٹے بچے کے نالے میں بہہ جانے کی بھی اطلاع موصول ہو رہی ہے۔ عوام کو مشکل حالات کا سامنا ہے۔