کارروائی کا شکار دکانداروں میں ناراضگی ، برسوں سے کاروبار کر رہے ہیں، انتظامیہ اب انہیں بے روزگار کر رہا ہے۔

پونے ضلع کے پمپری چنچوڑ  شہر میں میونسپل کارپوریشن نے انہدامی کارروائی شروع کی ہے۔ شہر کے کدل واڑی علاقے میں تقریباً ۵؍ ہزار غیر قانونی تعمیرات کو منہدم کرنے کی کارروائی شروع کی گئی جن میں سے زیادہ تر پترے کے شیڈ ہیں۔ یہاں زیادہ بھنگار والوںکے گودام ہیں۔  اس کارروائی سے مقامی دکاندار سخت ناراض ہیں کیونکہ ان کے مطابق وہ برسوں سے یہاں کاروبار کر رہے ہیں۔ 
  اطلاع کے مطابق پونے کے پمپری چنچوڑ شہری انتظامیہ نے کدل واڑی علاقے میں اچانک انہدامی کارروائی شروع کی ہے   اور یہاں کم و بیش ۵؍ ہزار دکانیں گرائی جانے والی ہیں جن میں کچھ پختہ تو کچھ نیم پختہ ہیں۔ زیادہ تر پترے کے شیڈ ہیں جو کہ بھنگار والوں کے گودام ہیں۔ یاد رہے کہ پمپری چنچوڑ میں بڑے پیمانے پر آٹو موبائل اور انڈسٹریل گالے ہیں۔ یہاں سے خاصا بھنگار نکلتا ہے۔ اس بھنگار کی خرید و فروخت کرنے والی سب سے زیادہ دکانیں کدل واڑی علاقے میں ہے۔ یہاں ڈھائی سو ایکڑ زمین پر  ۱۵۰۰؍ دکانیں ایک ساتھ ہیں جہاں یہ کاروبار ہوتا ہے۔ان دکانوں کو انہدامی دستہ  بلڈوزر  کے ذریعے منہدم کر رہا ہے۔ 
 حالانکہ ان دکانداروں کا کہنا ہے کہ وہ برسوں سے اسی جگہ پر کاروبار کر رہے ہیں۔ شہری انتظامیہ قانون کی دھونس دکھا کر ان کے پیٹ پر لات مارنے کی کوشش کر رہا ہے۔  ان دکانداروں کی شکایت ہے کہ ان کی باز آبادکاری کا کوئی مناسب انتظام کئے بغیر ان کی دکانیں گرائی جا رہی ہیں۔ ہم نے کئی بار مطالبہ کیا کہ ہمیں اسکریپ  مینجمنٹ یارڈ دستیاب کروایا جائے لیکن ایسا کیا نہیں گیا اور اب قانون کے نام پر ہمیں بے روزگار کیا جا رہا ہے۔ ان دکانداروں نے اس بات پر حیرانی ظاہر کی کہ شہر کا کوئی بھی سیاسی لیڈر اس معاملے میں سامنے نہیں آیا سب کے سب پوری طرح خاموش ہیں۔