ضلع جیل میں سماجی تنظیم اور جیل انتظامیہ کی جانب سے قیدیوں کو روزگار و کاروبارکی تربیت دی جارہی ہے تاکہ رہائی کے بعد وہ جرائم کی دنیا سےدور رہیں اور اپنا گزر بسر اور اہل خانہ کی کفالت محنت و ایمانداری سے کریں۔

جیل میں سزا کاٹنے والے قیدی رہا ہونے کے بعد جرائم کی دنیا سے باہر نکل کے بعد اپنا اور اہل خانہ کا گزر بسر محنت و ایمانداری سے کریں اس مقصد کے تحت قیدیوں کو جیل کے اندر کاروباری تربیت دینے کی کوشش دھولیہ ضلع جیل میں کی جارہی ہے۔ اسی کوشش کی ایک کڑی کے طور پر دھولیہ ضلع جیل میں اسپیشل انسپکٹر جنرل آف پولیس، جیل اصلاحی خدمات انتظامیہ مہاراشٹرریاست پونے، اسپیشل انسپکٹر جنرل آف پولیس ناسک کی رہنمائی میں دھولیہ ڈسٹرکٹ جیل کلاس ون اور اِنر وہیل کلب آف دھولیہ، کراس روڈ جین ایکس کے اشتراک سے قیدیوں کو قلیل مدتی بیکری کے کاموں کی تربیت دی گئی۔ 
  اس ضمن میں دھولیہ ضلع جیل کمشنر ای جی شندے نے تفصیل فراہم کرتے ہوئے بتایا۱۸؍ سے ۲۰؍ دسمبریعنی تین روز تک ہونے والی اس تربیت میں جیل کے۱۵؍ قیدیوں نے حصہ لیا۔ بیکری ٹریننگ کے ذریعے۲۵؍ مختلف قسم کے بیکری پروڈکٹس جیسے نان خطائی، بیسن نان خطائی، چاکلیٹ بالز، چاکلیٹ، کیک، ماربل کیک، پاؤ، کھاری وغیرہ بنانے کی تربیت دی گئی۔ 
 اس پروگرام میں ای جی شندے، سپرنٹنڈنٹ، جھنجھورڈے سینئر جیل آفیسر، سُربھی گپتا صدر، ساکشی مہاجن کوچ، مینل اگروال سابق صدر انر وہیل کلب آف دھولیہ کراس روڈ، ریا پٹیل سیکریٹری، تنیشکا جادھو رکن، منوہر بھدانے ٹیچر، تائڑے کانسٹیبل، سوناونے موجود تھے۔